Шончалай Кара-оолдуң амданныг манчылары

Бии-Хем кожууннуң Сесерлиг сумузунуң чурттакчызы Шончалай Кара-оол манчы кылыр биче цехти ажыдып алганын ТР-ниң Чонну ажылга хаара тудар төвү дыңнаткан.

Эгелеп чоруур сайгарлыкчы социал керээге үндезилээн күрүне деткимчези-биле цехке херек дериг-херекселди садып алгаш, күзүн ажыл-херээн ажыткан.

Ийи ажы-төлдүг ава хүнде он ажыг кил манчыны кылып турар. “Сесерлиг” манчыларын садыгларның баартактарында ол-ла хүн арыдыптарын Шончалай Кара-оол чугаалап турар. Ынчангаш ол эртенинде база-ла манчызын тудуп кириптер.

Сесерлигжилерниң ынак болу бергени хайындырарынга белен чемин “Социал керээ” программаның киржикчизи боду кылып четтигип турар.