Шуйнуң командазы тиилээн

Чылдың-на Хемчик бажы Бай-Тал суурга бөмбүктүг хоккей маргылдаазын эрттирери чаңчыл болган. Хоккейге ынактарның үрде манааны кышкы оюннарын байырлыг байдалга ажытканын Бай-Тайга кожууннуң баштыңы Экер Байс дыңнаткан.

Хоккей сезонунуң ажыдыышкыны-биле кожууннуң удуртулгазы спортчуларга болгаш аарыкчыларга байырын чедирип, солун болгаш көрүштүг оюннарны база тиилелгени күзээн.

Маргылдаага республиканың шыырак дээн сес командазы (Барыын-Хемчиктиң Аксы-Барлык, Чаа-Хөлдүң Ак-Туруг, Чөөн-Хемчиктиң Баян-Тала, Сүт-Хөлдүң Бора-Тайга (Сүмбер-Уула), Бай-Тайганың Бай-Тал (Урянхай), Шуй болгаш Кызыл-Даг) киришкен.

Дош шөлүнге «изиг-изиг» тулчуушкуннарның түңнелинде дөрткү черге Баян-Таланың, үшкү черге Бай-Талдың (Урянхай), ийиги черге Кызыл-Дагның хоккейжилери төлептиг болган. Бирги черни Шуйнуң командазы бүзүрелдии-биле чаалап алган.

– Бо удаада куш-ажылдың болгаш спорттуң хоочуну, сумунуң хүндүлүг хамаатызы Алексей Монгушович Ламажаптың 60 харлаан оюн демдеглевишаан, ырлыг-шоорлуг, шаңнал-макталдарлыг маргылдааны эрттирип турарывыс бо.

Тываның спорт сайыды С.Р. Монгуштуң база республиканың Бөмбүктүг хоккей федерациязының даргазы К.Б. Сагаан-оолдуң мурнундан хоочун спортчувуска Өөрүп четтириишкин бижиктерин дамчыттывыс.

Мугур харлап турар хоочун ойнакчыларның бирээзи аныяк-өскенге ам-даа үлегер-чижек болуп, оларны деткип чоруурун күзеп, каң дег быжыг кадыкшылды күзедивис – деп, кожуун баштыңы медеглээн.

Чуруктарны Буян Ооржак тырттырган