Бөгүн, Чоннуң чаңгыс деминиң хүнүнде, ТР-ниң Чазааның бажыңынга Россия Федерациязының болгаш Тыва Республиканың хөгжүлдезинге боттарының көскү үлүг-хуузун киирген шылгарааннарга күрүне шаңналдарны тыпсырының байырлыг езулалы болуп эрткен.
Тываның Баштыңы Владислав Ховалыг Чоннуң чаңгыс деминиң хүнү-биле байыр чедирген.
– Чоннуң чаңгыс деминиң хүнү бисти каттыштырып турар. Бодунуң чуртун болгаш хосталгазын камгалаар дээш, Россияның чону чаныш-сыныш чок болгаш маадырлыг чоруун көргүзүп турган төөгүлүг болуушкуннарны бо хүнде сактып тур бис.
Бо хүннүң ужур-дузазы амгы үеде каш катап күштелип келген. Чаа кыйгылар тыптып келген үеде тайбыңны болгаш күрүнениң иштинге эп-найыралдыг чорукту камгалап арттырар дээш, чаңгыс тура-соруктуг болуп шыдаарын бистиң ниитилеливис база катап бадыткап турар. Россияның күчүзү чаңгыс демивисте, бот-боттарывысты хүндүлээринде болгаш деткииринде дээрзинге төөгү бисти өөредип келген.
Тура-соруктуң демнии, акы-дуңмалышкы чорук болгаш найырал Тываның болгаш бистиң улуг чуртувустуң чурттакчы бүрүзүн үдеп чорзун. Чоннарның найыралы улам быжыксын, бистиң өгбелеривистиң культуразы болгаш езу-чаңчылдары чечектелзин, келир салгалдарга амыр-чаагай болгаш турум чорук өзүп көвүдезин – деп, Владислав Ховалыг чугаалаан.
Россия Федерациязының Президентизиниң Өөрүп четтириишкин бижиин Россияның Маадыры, рота командириниң оралакчызы, гвардияның лейтенантызы Мерген Донгакка тывыскан.
Россия Федерациязының Президентизи Владимир Путинниң Чарлыы-биле Эрес-дидим чоруктуң орденин гвардияның лейтенантызы Чингис Хомушкуга, «Эрес-дидим чоруу дээш» медаль-биле гвардияның биче лейтенантызы Алексей Поповту шаңнаан.
Тыва Республиканың Баштыңының Хүндүлел бижии-биле Сарыг-Септиң Юрий Гагарин аттыг бир дугаар школазының сан башкызы Татьяна Шатохина шаңнаткан.
Эрзинниң төп кожуун эмнелгезиниң уруглар салбырының эмчи сестразы Светлана Бадыга «Тыва Республиканың кадык камгалалының алдарлыг ажылдакчызы» атты тывыскан.
Өвүрнүң Хандагайтыда «Хүнчүгеш» уруглар садының кижизидикчи башкызы Римма Куулар, Тес-Хемниң Берт-Даг ортумак школазының сан болгаш физика башкызы Вера Санчат, Кызыл кожууннуң Шамбалыг ортумак школазының эге класстар башкызы Дадар Мортуй-оол олар «Тыва Республиканың өөредилгезиниң алдарлыг ажылдакчызы» атка төлептиг болган.
Чөөн-Хемчиктиң төп ном саң системазының директору Ирина Скорых «Тыва Республиканың культуразының алдарлыг ажылдакчызы» атка төлептиг болган.
«Авырга» спорт школазының спортчу хүреш талазы-биле тренер башкызы Владимир Тулушке «Тыва Республиканың алдарлыг тренери» атты тывыскан.
Тываның «Саяннар» национал хөгжүм болгаш танцы театрының дээди категориязының балет артизи Субудай Хомушку «Тыва Республиканың алдарлыг артизи» атка төлептиг болган.
Улуг-Хем кожууннуң спорт школазының спортчу хүреш талазы-биле тренер башкызы Херел Тагбага «Тыва Республиканың күш-культуразының болгаш спортунуң алдарлыг ажылдакчызы» атты тывыскан.
«Твой Информ» ниитилел-политиктиг солуннуң штаттан дашкаар корреспондентизи Лидия Иргитке «Тыва Республиканың улустуң чогаалчызы» атты тывыскан.
Тыва Республиканың «Шылгараңгай күш-ажылы дээш» медаль-биле Дыңнаары кошкак спортчулар школазының улуг тренер башкызы Артыш Доржу шаңнаткан.
Тываның Баштыңы Владислав Ховалыг тускай шериг опреациязының девискээринче Тывадан ээлчеглиг ачы-дуза чүъгүн чедирип чорааш, 55-ки гвардейжи тускай мото-адыгжы (даг) бригаданың тургустунганындан бээр он чылы база Дээди кол командылакчының чарлыы-биле Россияның эң бедик дайынчы шаңналдарының бирээзи – Кутузов ордени-биле шериг кезээн шаңнааны-биле дайынчыларга байыр чедирип, бригаданың элээн каш шериг-хүлээлгелиглеринге күрүне шаңналдарын болгаш мактал бижиктерни тывысканын дыңнаткан.
Чуруктарны Чингис Саая тырттырган
