Сибирь федералдыг округтуң регионнары элээн каш кол социал-экономиктиг көргүзүглер талазы-биле доктаамал өзүлдени чедип алган. Федералдыг күрүнениң статистика албанының 2023 чылга хамаарыштыр 2024 чылдың баш бурунгаар медээлери-биле алырга, оларның чамдыызы Россияның ортумак көргүзүүн ажып турар.
Алтай Республика – 111,3 хуу, Иркутск область – 109,5 хуу база Алтай край – 105,8 хууга үлетпүр бүдүрүлгезиниң индекизин өстүргеш, шылгараан. Ниитизи-биле округтуң көргүзүү 101,4 хуу болган. Казымак байлактар тывыжының хемчээли Алтай крайда – 125,9 хууга, Иркутск облазында – 113,9 хуу база Омск облазында – 110,5 хууга улгаткан.
Чуртталга тудуун ажыглалче киирери – социал-экономиктиг хөгжүлдениң кол критерийлериниң бирээзи – Тыва Республика 2023 чылга деңнээрге ийи катап хөй чуртталга шөлүн дужааган. Алтай Республикада, Хакас Республикада, Иркутск, Кемерово, Омск база Томск областарда ол чуртта ортумак көргүзүгнү ашкан. 2024 чылда округда 9,9 сая дөрбелчин метр чуртталга шөлүн дужааган, эң хөй чуртталга шөлүн киирген үш черже Новосибирск облазы, Иркутск облазы база Красноярск край кирген. Тыва Республика, Красноярск край база Новосибирск область кылдынган тудуг ажылдарының ниити хемчээли-биле тергиидеп, тус-тузунда 136,3 хуу, 112,8 база 112,3 хуу болганнар.
Сибирьниң чер ажылдыглары база улуг чедиишкиннерни көргүскен. Сибирь федералдыг округтуң экономиказынга бо адыр онза ужур-дузалыг. Агаар-бойдус берге болза-даа, эрткен чылын 17 хире сая тонна тараа культураларын ажаап алган, бир гектардан дүжүт 20 центнер четкен. Специалистерниң кызымак ажылының ачызында, округда көдээ ажыл-агый бүдүрүлгезиниң өзүлде темпизи чуртта ортумак көргүзүгден бедип, 104,3 хуу болган. Омск облазында ооң индекизи 117 хуу, Алтай крайда – 114,9 хуу, Новосибирск облазында – 102,3 хууга дең.
Сибирьниң он регионунуң сезинде үүрмек садыг-саарылга элээн өзүп, Россияда ортумак деңнелди ажып, округда – 109,1 хуу болган. Хөй-ниити чемненилгезиниң адырында өзүлде бар. Сибирьде туризм талазы-биле элээн сайзыраңгай регион – Алтай Республикада ооң индекизи 137 хуу болза, ортумак российжи деңнелде 109 хуу. Аян-чорукчулар ортузунга нептереңгей апар чыдар Тыва Республикада хөй-ниити чемненилгезиниң садып-саарылгазы 121,1 хуу, Алтай болгаш Красноярск крайларда – 111,1 хуу база 110,3 хуу кылдыр демдеглеттинген.
