Тываның Чазаа Тываның Баштыңы Владислав Ховалыгның удуртулгазы-биле «Сибирь дугуржулгазы» регионнар аразының ассоциациязының транспорт талазы-биле дүүштүрүлге чөвүлелиниң ээлчеглиг хуралы видеохарылзаа дамчыштыр эрткен.
Хуралга «Сибирь дугуржулгазы» регионнар аразының ассоциациязының транспорт талазы-биле дүүштүрүлге чөвүлелиниң федералдыг куратору – Россияның транспорт сайыдының оралакчызы Александр Пошивай, «Сибирь дугуржулгазы» регионнар аразының ассоциациязының күүсекчи комитединиң даргазы Геннадий Гусельников, Сибирь регионнарында күүсекчи эрге-чагырга органнарының удуртукчулары, эртем болгаш эксперт ниитилелдерниң төлээлери киришкен.
Россияның транспорт сайыдының оралакчызы Александр Пошивай эге сөстү алгаш, Сибирьниң транспорт инфратургузуунга хамааржыр күрүне политиказының кол сорулгазы – макрорегионнуң узун хуусаалыг болгаш турум хөгжүлдезинге байдалдарны тургузары дээрзин демдеглээн.
Владислав Ховалыг хуралды ажыдып тура, ажылдың кол угланыышкыннарын сайгарарын саналдаан: «Бөгүн бистиң Чөвүлеливис автоорук инфратургузуун хөгжүдер адырда болгаш Сибирь федералдыг округтуң 2035 чылга чедир социал-экономиктиг хөгжүлде стратегиязын боттандырар планда чамдык пунктуларны күүседириниң талазы-биле онза чугула элээн каш айтырыгларны сайгарар бис. Ол дээрге орук болгаш туризм инфраструктуразы, деңзи-хемчээл контролю, транспорт төлевилелдеринге акша-хөреңги деткимчезиниң аргалары, ол ышкаш демир-орук коридорлары-биле холбаалыг айтырыглар-дыр».
Регионнар аразының “Сибирь дугуржулгазы” ассоциациязының кежигүннери хүн чурумунуң бир айтырыынга Сибирь регионнарында транспорт инфратургузуун хөгжүдериниң айтырыгларын сайгарып, оларны шиитпирлээринге санал-оналдарны дыңнаан. Тодаргайлаарга, Сибирь регионнарында турисчи объектилерже транспорттуң чедингирин экижидеринче угланган, тус черниң автомобиль оруктарын хөгжүдериниң оруктарын сайгарган. Оон аңгыда, автоматчыткан деңзи-хемчээл контрольдаар пунктулар системаларының үре-түңнелин бедидер айтырыгларны база сайгарган.
Бо айтырыгларны шиитпирлээри-биле Сибирьниң регионалдыг эрге-чагыргаларынга «Амыдыралдың инфратургузуу» база «Туризм болгаш аалчылар хүлээп алыры» национал төлевилелдерниң ажылын дүүштүрер, чаартылгалыг материалдар-биле орук шывыгларының чаңгыс аай стандартын ажылдап кылыр, турисчи объектилерже баар оруктар тударынга күрүне-хууда кады ажылдажылга аргаларын идепкейлиг ажыглаар ведомстволар аразының төлевилел офизин тургузар санал кирген.
Ийиги айтырыгда хуралдың киржикчилери – Сибирь федералдыг округтуң регионнар аразының ассоциация чөвүлелиниң ооң мурнунда хүлээп алганы 100 дугаар шиитпирлерниң болгаш 2035 чылга чедир Сибирь федералдыг округтуң социал-экономиктиг хөгжүлде стратегиязын боттандырар планының күүселделерин, ында демир-орук коридорларының перспективтиг темазын сайгарган. Ооң мурнунда регионнар аразының “Сибирь дугуржулгазы” ассоциация чөвүлелиниң 100 дугаарлыг шиитпири-биле: Соңгу-Сибирьниң демир-орук магистралы база Төп-Евразийжи транспорт коридору ийи улуг төлевилел ажылдап эгелээн.
Сибирь регионнарының экономиктиг арга-шинээн ажыдарының кол аргазы – демир-орук коридорларын тударында деп сайгыралга үезинде демдеглээн. Чурттуң кол судалдары – Транссибирь болгаш Байкал-Амур магистраль оруктарында чөөн чүкче угланган орук шимчээшкининде шаптыктап турар улуг чүък чаа маршруттарны ажыдарын негеп келген.
«Сибирь дугуржулгазы» регионнар аразының ассоциациязынче кирген регионнарда транспорт инфратургузуун хөгжүдер эчис сорулганы чаа экономиктиг байдалдарга болгаш чурттар аразының логистиказы өскерилгенинге дүүштүрер дээш, Координация чөвүлелиниң кежигүннери чаа демир-орук коридорларының төлевилелдер-биле ажылдың чордуунга хамаарыштыр медээлерни чаартырын шиитпирлээн.
«Сибирьжилерниң амыдырал-чуртталгазының шынарын бедидеринге, экономиканың турум өзүлдезинге болгаш бистиң делгем девискээривиске транспорт харылзаазын экижидеринге практиктиг арга-хевирлерни ажылдап кылырынга ханы уткалыг болгаш ажыктыг чугаа болган» - деп, Владислав Ховалыг регионнар аразының “Сибирь дугуржулгазы” ассоциациязының хуралының соонда бодунуң телеграм каналынга дыңнаткан.