Сүт-Хөл кожуунуда сиген белеткели шалыпкын чоруп турарын кожууннуң чагырга даргазы Орлан Монгуш дыңнаткан.
– Дыштаныр хүннерде шөлдер кезип, Бора-Тайга талазынче үнүп, сигенчилер-биле ужуражып, ажыл-агыйжы чугааны кылдывыс.
Эрткен чылга деңээрге, кожуунда сигенниң үнгени эки, ортумак деңнелде. Сиген кезилдезин баштай эгелээн улус ажылын доозуп, кыштагларже мал чемин сөөртүп турар. Талдар, хараганнар аразында, арыг иштинде сиген бар-дыр.
Сигенчилер кааң, аяс күскү хүннерни ажыглап, кызымаккай ажылдап турар. Чамдыызы сиген кескен, өскелери бөлген, чүдүрген…