Социал керээге үндезилээн күрүне деткимчези: Документилерни хүлээп эгелээн

Тываның Күш-ажыл болгаш социал политика яамызының дыңнатканы-биле алырга, 2025 чылда республика социал керээге үндезилээн күрүне деткимчезиниң хемчеглерин боттандырылгазынче ниитизи-биле 750,8 сая рубльди алыр.

Социал керээлер чарарының негелделери болгаш чуруму өскерилбейн арткан. Амыдырап-чурттаарының кудуку хемчээлинден эвээш орулгалыг өг-бүлелерге азы чааскаан чурттап турар хамаатыларга дузаламчыны көргүзер – Тывада 2025 чылда ол 17910 рубль кылдыр доктааттынган.

Төлевирлерниң хемчээли: «Ажыл дилээр» угланыышкынга: керээни чарган соонда баштайгы айында база ажылга тургустунганын бадыткаанының соонда үш ай дургузунда 19 522 рубль; «Амыдыралдың берге байдалын ажып эртер» угланыышкынга – үштен алды ай дургузунда ай санында-ла 19 522 рубль; Хууда сайгарлыкчы чорукту ажыдарынга – 350 000 рубль хемчээлдиг хары угда бээр төлевир; Хууда дузалал ажыл-агыйын тударынга – 200 000 рубль хемчээлдиг хары угда бээр төлевир.

ТР-ниң Күш-ажыл болгаш социал политика яамызының, Чонну ажылга хаара тудар болгаш кожуун төптеринде Өг-бүлеге болгаш уругларга социал дуза төптериниң албан езунуң курлавырларында социал керээ чарарынга херек документилерниң даңзызын парлаан. Документилерни аңаа-ла дужаап болур.

Ол ышкаш Хөй хүлээлгелиг төп база Күрүне ачы-дузазының порталы таварыштыр ону киирип болур. Дөрт угланыышкынның кайы бирээзинге деткимче алыры-биле документилерни ам бо дораан киирип болурун албан чери дыңнаткан.

Күрүне деткимчези-биле бизнести эгелеп азы хууда дузалал ажыл-агыйын тургузар дээн кижи хууда сайгарлыкчы азы бодун ажыл-биле хандыртынган кижи кылдыр бүрүткедип алыры албан сагыыр негелде болур.

Амыдыралдың берге байдалын ажып эртеринче угланган акша-хөреңги-биле бирги хереглел барааннарын, эм-таң, идик-хеп садып ап, коммунал ачы-дузаларны төлеп база өске-даа чугула херек чүүлдерже ажыглап болур.