Тываның Баштыңы Владислав Ховалыг социал объектилерниң үндезин септелгезинге хүн бүрүде хыналданы чорударын сайыттардан негээн.
Тывада бо чылын үндезин септелге кылыры планнаттынган 47 социал объектиниң 31-зинде ажылдар доозулган. Октябрь 20-ниң хүнү-биле алырга, 16 объектиде септелге ажылдары уламчылап турар. Септелге дээш харыысалгалыг яамыларның удуртукчулары ажылдарның кайы хире чоруп турарын Владислав Ховалыгга илеткээн.
Объектилерниң хөй кезиинде ажылдарның чартыындан хөйү, азы 50-94 хуузу доозулган. Ажылдың хуусаазы узадыр, тодаргайлаарга, Тожу биле Чаа-Хөл кожуун эмнелгелеринге, республиканың туберкулезка удур диспансериниң Кызыл-Мажалыкта салбырынга, Сукпак, Хову-Аксы, Терлиг-Хая школаларынга, Кызылдың агро-үлетпүр техникумунуң өөредилге корпусунга, Кызылдың уран чүүл колледжизинге, олимпийжи курлавыр спорт школалазының Кызыл-Хая биле Чыраа-Бажы суурларда салбырларынга капитал септелге ажылдарының хуусаазын узаткан.
Владислав Ховалыг хуралдың төнчүзүнде,кадык камгалал, өөредилге болгаш культура сайыттарынга, Кызыл хоорай, Чеди-Хөл, Чөөн-Хемчик, Кызыл, Тожу, Чаа-Хөл, Сүт-Хөл, Эрзин, Таңды кожуун чагырга даргаларынга тудуг ажылдары шуут доостурунга чедир хүн бүрүде боттары ажылдарны хынаарын дааскан.
«Келир чылын 28 объектиге үндезин септелгени чорударын планнаан бис. 2026 чылда эде чаартыр объектилерге тудуг черлерин тодарадыр мөөрей ажылын үе шаанда чорударын, база объект бүрүзүнге болгу дег шаптараазыннар-биле ажылдаар хемчеглерниң тодаргай календарь планын бадылаарын республиканың күүсекчи эрге-чагырга органнарының удуртукчуларынга берип тур мен» – деп, Тываның Баштыңы бодунуң социал четкилеринге дыңнаткан.
Бо чылын «Өг-бүле» база «Аныяктар болгаш уруглар» национал төлевилелдер, ол ышкаш федералдыг программалар шугуму-биле тускайлаан федералдыг акша-хөреңгиге бо чылын 7 школа, Тываның агроүлетпүр техникумунуң 2 өөредилге оран-савазы савазы (өөредилге корпусу, ниитиниң чуртталга бажыңы) дээш, 11 өөредилге объектизинде улуг септелгелер чоруп турар. Мугур-Аксы суурда каттышкан хевирниң 2 дугаар «Чечек» уруглар садында база «Таежный» стационарлыг уруглар дыштанылга лагериниң оран-савазында септелге ажылдары доозулган.
«Өг-бүле» национал төлевилел күүселдези-биле Эрзин кожууннуң Бай-Даг суурда көдээ культура бажыңында, Сүт-Хөл кожууннуң Бора-Тайга суурнуң улусчу театрда, Өвүр кожууннуң Саглы суурда ном саңының бажыңында үндезин септелге ажылдары чоруп турар. Республика бюджединиң акша-хөреңгизи-биле «Культура болгаш уран чүүлдүң хөгжүлдези» регионалдыг күрүне программазы-биле алды культура албан черлерин эде чаарткан.
Тыва Республиканың «Тыва Республикада хамаатыларга социал деткимче» күрүне программазының күүселдезинче көрдүнген акша-хөреңги-биле Ак-Довурак хоорайда болгаш Тес-Хем кожуунда Өг-бүлеге болгаш уругларга социал дуза чедирер төптерни, Кызылдың хоочуннар болгаш инвалидтер бажыңын, Хайыраканның бажың-интернадынга бир дугаар үндезин септелге ажылдарын чоруткан.
Оон аңгыда, кадык камгалалының 11 объектилеринге, Спорт яамызының албан черинде 12 оран-савага эде чаартылга ажылдары чоруп турар.
