Республиканың школаларында Чаа чыл байырлалының утренниктери болуп эгелээнин республиканың немелде өөредилге сайзырадыр төвү дыңнаткан.
Бо хүннерде Кызылдың 19 дугаар школазының эге класстарынга солун байырлалды сам башкызы Василика Самбылдың удуртулгазы-биле эрттирген.
Каржы Чылбыга-кадай Соок-Ирейниң изин будап кааптарга-даа, Харжыгаш, Алиса дилги, Базилио диис база өске-даа омак-хөглүг, чогаадыкчы уруглар, оолдарның дузазы-биле орукту тып чедип келир. Соок-Ирей уруг бүрүзүнүң ыры-шүлүүн дыңнап, каас-чараш шивиниң оттарын кывыскан.
Байырлалга ыры-шүлүк, сам база оюннар үзүктелбээн. Соок-Ирей база Харжыгаш уругларга белектерни үлээн.