«Сорунза» хоочуннар клувунуң 25 чыл ою

Шагаан-Арыг хоорайның культура төвүнге «Сорунза» хоочуннар болгаш пенсионерлер клувунуң 25 чыл оюн демдеглээнин чагырга чери дыңнаткан.

Бо хүнде клубта 39 кижи бактаап турар. Оларның аразында 60-70 хар иштинде 15, 71-ден 80 харга чедир 13, 81-ден 90 харга чедир 11 хоочун бар. Олар назы-харының аайы-биле дөрт аңгы бөлүкте чарлып алгаш, хөй-ниити ажылдарындан, фестиваль-мөөрейлерден, спортчу оюннардан чыда калбайн, киржип турар.

Хоочуннарның аразында күш-ажылдың хоочуннары болгаш Тываның база кожууннуң алдарлыг ажылдакчылары хөй.

ТР-ниң Дээди Хуралының даргазы [id365637382|К.Т. Даваа] хоочуннарга байыр чедирип, идепкейлиг хөй-ниитижи хоочуннарга шаңналдарны тывыскан.

Кожууннуң Төлээлекчилер хуралы идепкейжилерни юбилейлиг медальдар, Шагаан-Арыг хоорайның чагыргазы «Шагаан-Арыг хоорайның хүндүлүг чурттакчызы» деп хөрек демдектери-биле шаңнап-мактаан.

Дайын чылдарында бичии үелери эрткен хоочуннарга «Дайын уруглары» деп медальдарны тывыскан.

Адыр аайы-биле ажылдап чораан хоочуннарга албан черлерниң удуртукчулары белектерни, дириг чечектерни тывыспышаан, «Сорунза» клувунга база суй белээн сунган.

Шагаан-Арыгның бир дугаар школазының өөреникчилери, “Он-Кум” мода болгаш костюм театры ыры-самын бараалгаткан.

Сорунзажылар боттарының клувунга эрттирип турган мөөрейлериниң тиилекчилерин демдеглеп, аалчыларга солун концертин диңмиттиг адыш часкаашкыннары-биле көргүскеннер.

Хемчегниң хөй санныг аалчылары могаг-шылаг билбес хоочуннарга байыр чедириишкиннеринге каттышкан.

Хоочуннарның ажыл-чорудулгазының херечизи – чылдар аайы-биле аскан чуруктарда болгаш альбомнарда делгеттинген.