Улуг-Хем кожууннуң чагырга даргазының амыдырал-хандырылга талазы-биле оралакчызы Мурат Ховалыг, культура эргелелиниң удуртукчузу Чойганмаа Даваа, Арыг-Үзүү суму чагыргазының даргазы Артыш Соян база культура бажыңының директору Светлана Соян Арыг-Үзүүнде тудуг объектизинге үнүүшкүннүг хуралды эрттиргенин культура албан чери дыңнаткан.
Ажылчын бөлүк тудуг ажылдарының графигин сагыырын, объектини тударының моон соңгааргы чадаларын чугаалашкан.
Ооң мурнунда тудуг шөлүнге ТР-ниң культура сайыды Виктор Чигжит кээп, тудугну материалдар-биле хандырылгазын хынап, хүлээникчи-биле тургустунуп келген айтырыгларны сайгарган.
Бо чылын «Сорунза» төлевилели-биле Тээли, Сайлыг, Арыг-Үзүү, Ээрбек суурларга чаа культура төптериниң тудуу чоруп турарын сагындыраал.
