Кызыл хоорайның 16 дугаар лицейинге ат-сураглыг тыва эки турачы, Совет Эвилелиниң Маадыры Чүргүй-оол Намгаевич Хомушкунуң уйнуу Чаян Хомушку өөреникчилер-биле ужуражылгага киришкенин республиканың немелде өөредилге сайзырадыр төвү дыңнаткан.
Чаян Хомушку – тускай шериг операциязының киржикчизи, офицер. Тывада кыска хуусаалыг шөлээзиниң үезинде чедип келгеш, лицейжилер-биле ужуражыр аргалыг болган.
Маадырның уйнуу шериг албан ажылын механик-чолаачы кылдыр эгелээн болгаш, батальон командири эрге-дужаалга четкен. Чаян Хомушку 9 «б», 6 «д» класстарның өөреникчилеринге бодунуң дайынчы оруундан солун төөгүлерни чугаалап берген. Ол чеже-даа аныяк болза, тускай шериг операциязының бирги хүнүнден бээр чаңгыс эвес удаа тулчуушкуннарга киришкен арга-дуржулгалыг командир болуп турар.
Лицейжилер аныяк офицерниң чугаазын улуг сонуургал-биле дыңнап, айтырыгларны салгылаан: шеригниң мурнуку одуруунда хүннер, дайынчы эштери, берге байдалдарда тиилелгеге чүү дузалаарыл дээш оон-даа өске.
Ч.Ч. Хомушку өөреникчилерниң айтырыгларынга езулуг маадырларны билип алзын дээш хөөредиг чокка шынын чугаалап турган.
Тоску болгаш алдыгы классчыларга ужуражылга чүгле төөгүнүң эвес, а эрес-дидим чоруктуң кичээли болган.