Спортка шынчы хандыкшылы-биле өскелерден ылгалган

Эрткен дыштаныр хүннерде Шагаан-Арыгга салым-чаяанныг спортчу Валентин Папий-оолдуң чырык адынга тураскааткан республика чергелиг хол бөмбүүнүң маргылдаазы болуп эрткенин ТР-ниң Дээди Хуралының Даргазы Кан-оол Даваа медеглээн.

– Валентин Монгушевичини эки таныыр улуска ол чүгле Тыва Республиканың болгаш Чита облазының хөй дакпыр чемпиону эвес, а спортчу тура-соруктуң болгаш бодунуң сонуургалынга бердинген чоруктуң демдээ чораан.

Спортчу Шагаан-Арыгга күш-культура башкызы болуп ажылдап чорааш, ажылынга сагыш-сеткилинден бердинген турган. Ол спортка шынчы хандыкшылы-биле өскелерден ылгалып, ынаар өөреникчилерни чайгаар хаара тудуп, оларның аразындан салым-чаяанныгларны илередип, өөредип-кижизидип чораан.

Ажылынга харыысалгалыг болгаш ылаптыг чоруу өске улуска эки үлегер болуп турганын база утпаалы. Ооң хөй санныг өөреникчилери спортту болгаш ооң башкылаашкынын амыдыралының кол угланыышкыны, мергежили кылдыр шилип алганнар.

Бо маргылдаа-биле – ооң киржикчилери командалар-биле кады Валентин Монгушевичиге ханы хүндүткеливисти илередип тур бис. Өөрүп четтириишкинниң онза сөстерин бо маргылдааны чаңчылчаан чадаже көдүрген дөргүл-төрелдеринге илередип тур бис. Спортка ооң хандыкшып чорааны ышкаш, ынак болуңар!