ССРЭ-ниң составынче Тыва Арат Республиканың киргенинден бээр 80 чылынга

ССРЭ-ниң составынче Тыва Арат Республиканың киргенинден бээр 80 чылын байырлаарын белеткеп эрттирер оргкомитетти Тывада тургускан. ТР-ниң Чазак Даргазының оралакчызы Орлан Сарыглар ону удуртур. Ооң составынче күүсекчи эрге-чагырганың территориалдыг органнарының база чамдык яамылар болгаш албан черлериниң удуртукчулары кирген.

Тываның Баштыңы Владислав Ховалыг төөгүлүг болуушкунга тураскааткан хемчеглерни белеткеп база эрттирериниң планын ажылдап кылгаш, 2024 чылдың апрель 10-га чедир бадыладыр даалганы оргкомитет кежигүннеринге берген. Республиканың муниципалдыг тургузуглары болгаш хоорай округтары ССРЭ-ниң составынче ТАР-ның киргениниң 80 чылдаан байырлалын белеткеп база эрттирериниң талазы-биле нормативтиг-эрге-хоойлу актыларын бадылаар ужурлуг.

ССРЭ-ниң Дээди Совединиң Президиумунуң 1944 чылдың октябрь 11-де 528/3 дугаарлыг чарлыы-биле Совет Социалистиг Республикалар Эвилелиниң составынче Тыва Арат Республиканы хүлээп алган. Тыва Арат Республиканың ажылчы чонунуң Биче Хуралының дилээнге даянгаш, Совет Социалистиг Республикалар Эвилелиниң составынче киирер дугайында шиитпир үнген.

1941 чылдың апрельде Тыва республиканың удуртулгазы тыва чоннуң хөй кезииниң күзелин илередип, совет күрүнениң составынче ТАР-ны киирер дугайында дилегни киирген. Ада-чурттуң улуг дайынының чылдарында Совет Эвилелиниң кезии болуксаан ТАР-ның хамаатыларның күзели улам быжыккан.

ТАР-ның Биче Хуралының 1944 чылдың август сессиязында ол айтырыгны чүүлдүг дээн деклерация чаңгыс үн-биле хүлээп алдынган. 1944 чылдың октябрь 11-де Тыва Арат Республиканы РСФСР-ниң составынче хүлээп алган, а октябрьның 13-те ССРЭ-ниң составынга автономнуг область эргени алган. Ынчалдыр Тыва автономнуг область тургустунган.