Совет Эвилелиниӊ Маадыры М.А. Бухтуев аттыг Кызылдыӊ бир дугаар школазынга «Үжүглелим, байырлыг!» деп байырлал болуп эрткенин Тываныӊ күрүне университеди дыңнаткан.
А.А. Даржай аттыг Кызылдыӊ педагогика институдунуӊ бирги курсчулары 1 «б» класстың байырлалынга аалдап четкен.
Байырлалдыӊ башкарыкчылары болгаш аалчылары Ника Монгуш, Ховалыг Аганак, Сырга Момбуй болгаш тыва дыл башкызы, бөлүктүӊ куратору Шеңне Азыраа өөреникчилер-биле деӊге үжүглел ному-биле байырлажып, ийиги класстан тура өөренир «Тыва дыл» болгаш «Литературлуг номчулга» эртемнерни таныштырып, солун оюннарны эрттирген.
Өөреникчилер «Үжүглел» эртеминге номчуп, бижип алганын бадыткап, Шоома Даржайныӊ «Үжүглелим үжүктери» деп шүлүүнде 36 үжүктерниӊ дугайында чугаалааннар. Ада-иелер уругларын деткип, чараш байырлалга келген.
Хемчегниӊ төнчүзүнде класстыӊ башкызы Айлаң Ооржак өөреникчилеринге эки чайгы дыштанылганы, ада-иезиниӊ сөзүн дыӊнап, айыыл чок чоруктуӊ дүрүмнерин хажыт чокка сагыырын чагаан.