Чайын уруглар хөй ойнаар, кудумчуга хостуг үезин эрттирер. Ооң-биле чергелештир уругларның берттинип-кемдээр айыылы тургустунуп болур.
Ада-ие чаш уругларның амы-тыны, кадыкшылы дээш харыысалгалыг дээрзин республиканың немелде өөредилге сайзырадыр төвү дыңнаткан. Олар уругларга айыыл чок байдалды тургузуп, ооң дүрүмнеринге өөредир ужурлуг. А эң-не кол чүүл – уругну хайгаарал чокка арттырып болбас.
Уругларның айыыл чок чоруунга хамаарышкан дүрүмнерни уруг бүрүзү сагып, ону билген турар ужурлуг.
Чайын хем-сугга уруглар, болганчок-ла, улуг кижилерниң хайгааралы чокка эштип турар болур. Ону шуут болдурбас. Уругга тайылбырлаар: хем эриинче, хөлдерже чүгле ада-ие-биле барып болур. Бодунуң барып көрбээн черлеринге эштири хоруглуг. Сугже кирер мурнунда, ооң девискээрин шинчилеп көөр.
Уругларның сагыыр ужурлуг дүрүмнери:
- Сугга ойнаары айыылдыг: эштерин сугже киир итпес, суг адаанга чаштынчып ойнавас.
- Сугже таарымча чок черден шураары хоруглуг.
- Суг үнүжү бар, оът-сигенниң черлерге эштип болбас.
- Үрдүрүп каан матрацтар-биле ырадыр эштип чорууру хоруглуг.
- Сугга дүшкен кижи өттүнүп, меге дуза кыйгырбас.
