Сукпактың уран чүүл школазында улустуң ыры болгаш хөөмей салбырын ажыткан

Эрткен чылын “Культура” национал төлевилел-биле Кызыл-Хая, Тээли база Сукпак суурларынга уругларның уран чүүл школалары үндезин септелге соонда ажыттынган. Ол ышкаш өөредилге черлери чаа эт-сеп, дериг-херекселдер база хөгжүм херекселдери-биле чаартынган.

Тываның Баштыңы Владислав Ховалыгның деткимчезиниң ачызында Сукпактың уругларның уран чүүл школазында улустуң ыры болгаш хөөмей салбыры ажыттынган. Уруглар тыва национал хөгжүм херекселдеринге (дошпулуур, игил, бызаанчы, чадаган) ойнаарынга дыка ынак дээрзин чадаган клазының башкы Айлаңмаа Дамбар чугаалап турар.

Тыва үндезин культура төвүнүң директору Игорь Көшкендей уругларның сеткил-чүрээн хаара туткан уран чүүл школазының башкыларының үре-түңнелдиг ажылы – ажы-төлдүң улуг-улуг чедиишкиннери болуп, ажыл-ижи сайзыраарын йөрээген.

– Тыва чон бойдузундан уран-талантылыг, салым-чаяанныг, ыры-хөгжүмге ынак, ындындан сундулуг. Өзүп орар аныяк салгалга долгандыр турар бойдустуң чаражын, оларның чажыттарын сонуургап, уран чүүлдүң янзы-бүрү хевирлери таварыштыр чарашсынып, магадап, өөренип алырынче хөгжүм, ыры, чурулга дээн ышкаш чүүлдер ала-чайгаар эккээр.

Амгы үениң негелделеринге дүүштүр кылдынган чырык, чылыг, чаа дериг-херексел болгаш хөгжүм херекселдери-биле хандырттынган Сукпак суурда чаартынган школаны Тываның Баштыңы Владислав Ховалыг болгаш культура сайыды Виктор Чигжиттиң бо бүгүнү чедип алыр дээш шупту бар аргаларны, байдалды тургузуп берип турары канчаар-даа аажок өөрүнчүг.