Кызылда президентиниң кадет училищезинде немелде өөредилгениң башкызы Долаан Салчак «Суворов болгаш шыдыраа. Сураглыг полководчунуң стратегиязы» деп шыдыраага ажык кичээлди 7 «б» класстың кадеттеринге эрттиргенин республиканың немелде өөредилге сайзырадыр төвү дыңнаткан.
Сураглыг полководчу шыдырааны стратегтиг сайзыралдың чугула херексели кылдыр санап чораан болгаш, тулчуушкуннарга чаңгыс-даа аштырыышкынга таварышпаан.
Кичээлдиң кол сорулгазы – шыдырааны ат-сураглыг полководчу А.В. Суворовтуң шериг чорудулгаларының бир модели болгаш тактиказының база чуртталгазының чижээнге стратегтиг угаан-бодалды сайзырадыр херексел кылдыр кадеттерге билиндирери.
Кичээлге башкы онзагай аргаларны, солун хевирлерни, технологияларны ажыглаан. Ооң ажылында сан, төөгү, эртем адырлары-биле харылзаа тургустунган.
Кадеттер шыдыраа бодалгаларын А.В. Суворовтуң принциптеринге үндезилеп, чедиишкинниг шиитпирлээн – карак-биле хемчээри, шалыпкыны, халдаашкыны. Ол бүгү сайгарылгалыг угаан-бодалды сайзырадырынга, шериг чорудулгазының ниити стратегтиг принциптеринден шыдыраа партиязынче шилчиир аргаларны хевирлээринге идигни бээр дээрзин кадеттер билип алганнар.