Төрээн дылдар башкыларының аразынга Алдынай Даржай шылгараан

«Чылдың башкызы» деп мөөрейниң иштинге төрээн дылдар башкыларының аразында база мөөрей болуп эрткен. Бо чылын аңаа 11 орус дыл, 16 тыва дыл башкылары киришкен.

Национал школа хөгжүдер институттуң директору, тыва дыл инспектору Сайзана Товуу мөөрейге киришкен шупту тыва дыл башкыларынга байырын чедирген.

– Шылгалданы эрткен, улуг дуржулганы алган. Башкыларывыс шыырак ажылдап турар-дыр деп көрдүм. Аныяк башкыларның база кызымак туружун айтып, сорулгалары бедик деп үнелеп тур мен.

Тиилекчи башкылар – шынап-ла алган адынга таарышкан, ёзулуг «мастер» атты чаалап алган Аянмаа Даваа башкывыс. Аныяк башкы Ульяна Байыр-ооловна база эр-хей болду, ам-даа чедиишкиннерлиг болурун күзедим.

Тиилекчивис Алдынай Даржай – Тываның кадет корпузунуң төрээн (тыва) дыл болгаш чогаал башкызы. Ол “Төрээн болгаш орус дылдар башкыларының бүгү-российжи мастер-клазы-2022” мөөрейге шылгараан.