Россияның чоннарының төрээн дылдарынга болгаш литератураларынга школачыларның Федералдыг олимпиадазының шилилге чадазы эгелээнин Национал школа хөгжүдер институт дыңнаткан.
Эрзин, Тес-Хем кожууннарының школаларынга Национал школа хөгжүдер институттуң директору Елена Куулар, ТывКУ-нуң тыва филология болгаш ниити дыл эртеминиң кафедразының доцентилери Надежда Сувандии база Айланмаа Соян 8-11 класстарының өөреникчилеринге консультацияны эрттирген.
Федералдыг олимпиадага киржип, эки түңнелдерлиг болурга, чүгле Тываның эвес, харын-даа Россияның аңгы-аңгы хоорайларының педагогиктиг угланыышкынныг дээди өөредилге черлеринче дужаап кирип алырынга көрдүнген чиигелделер, деткимче дугайында тайылбырны филология факультединиң деканы Надежда Сувандии таныштырган.
Эртемден башкылар даалгаларны күүседириниң мурунда тыва дыл болгаш чогаал эртемнеринге консультацияны эрттирип, өөреникчилерниң айтырыгларынга харыылааннар. Федералдыг олимпиадага киржир чагыгларны бүрүткедирин тайылбырлап, көргүскениниң соонда, өөреникчилер шилилге чаданың онаалгаларын күүсеткеннер.
Тыва дыл, чогаал башкылары өөреникчилерни кожууннар төвүнде школаларга чыып эккеп, ажылынга харыысалгалыын көргүскен.
Төрээн дыл болгаш чогаалга школачылар аразынга олимпиадалар төрээн дылдарны болгаш культураларны кадагалап, хөгжүдеринге үлүг-хуузун киирип шыдаар салым-чаяанныг аныяктарны илередип, оларны деткиириниң чугула аргазы деп санап турар.
Олимпиада 2026 чылдың январь 11-ге чедир уламчылаарын дыңнатпышаан, бо хечегге өөреникчилерни хөйү-биле киржирин институт кыйгырган.