Шагаа байырлалының бүдүүзүнде таңдыжыларның үрде манааны чаа "Дагден Донгак Чойлинг" хүрээзин байырлыг байдалга ажытканын кожууннуң чагырга чери дыңнаткан.
ТР-ниң Чазак Даргазының оралакчызы Алик Монгуш, Тываның IV Камбы-Ламазы Гелек Нацык-Доржу Башкы таңдыжыларның өөрүшкүзүн үлежип, байырын чедирген.
Оралакчы дарга буянныг үүле-херек эки туңнелдиг болганы дээш чонга четтиргенин илереткен. Хурээниң долгандыр девискээрин чаагайжыдып, ишти-даштын сарыг шажын дүрүмнеринге дүгжүп турар кылдыр чаартып, ажылдарны уламчылаарын дыңнаткан.
«Кожуун төвүнде чонувустуң күжү-биле туттунган хүрээвиске Тываның IV Камбы-Ламазы Гелек Нацык-Доржу Башкы кээп, бодунуң үлүг-хуузун киирип, 50 муң рубль өргүлүн сөңнээн» – деп, Таңды кожууннуң чагырга чериниң даргазы Сайлык-оол Оюн соцчеткиде бижээн.
Чаа хурээге бир дугаар номналды «Цеченлинг» хүрээзиниң болгаш кожууннуң Даа ламазы Эрес Башкы номчаан.
Таңды чонунуң демнежип тургаш туткан хүрээзи, Шагаа бүдүүзүнде ажыттынганы, оларга онзагай белек болган. Кожуунуң аңгы-ангы булуңнарындан чыылган чон, чүдүкчүлер сагыш-сеткилинден өөрүшкүзүн илередип турган.
Таңдыда чаа хүрээ ажыттынган
9 февраля 2024
45