Таңдыдан Аңчы Очурнуң «Мерген-Кежик» деп ажылы тиилээн

Тыва үндезин культура төвү Донгак Окаанчык аттыг ыяштан биче хемчээлдиг скульптуралар чазап-сиилбиир республика чергелиг мөөрейниң түңнелдерин дыңнаткан.

Россияда чоннарның культурлуг өнчүзүнүң чылынга тураскааткан мөөрей беш хүн үргүлчүлээн. Аңаа ыраккы Мөңгүн-Тайга, Барыын-Хемчик, Чөөн-Хемчик, Чаа-Хөл, Эрзин, Таңды кожууннардан он ус-шевер киришкен.

Жюри кежигүннери Россияның чурукчулар эвилелиниң кежигүнү, Тываның уран чүүлүнүң алдарлыг ажылдакчызы Александр Ойдуп, Россияның культуразының алдарлыг ажылдакчызы, Тываның улустуң чурукчузу Начын Шалык, Тываның улустуң ус-шевери Сайдаш Момбужай биче хемчээлдиг ыяштан хевир-дүрзү чазап-сиилбиирин сайзырадыр сорулгалыг мөөрейниң тиилекчилерин илереткен.

I черни Таңдыдан Аңчы Очур «Мерген-Кежик» деп ажылы-биле, II черни Чөөн-Хемчиктен Начын Монгуш «Хоор чоннуң хөөмейжизи – Хорагай Ооржак» деп ажылы-биле, III черни Мөңгүн-Тайгадан Арим Иргит «Далган» деп ажылы-биле чаалап алган.

Ук мөөрейни эрттиреринге херек материал-биле деткимчени Тываның Культура яамызы болгаш Алдан-Маадыр аттыг национал музей көргүскен.