Тываның Аныяктар херектериниң талазы-биле агентилел Голевтиң даг-руда компаниязы-биле Ада-чурттуң Улуг дайынының хоочуннарынга Тиилелге хүнүнүң бүдүүзүнде аалдап чедип, аъш-чемни чедирип бергенин агентилелдиң директору Буян Сонам дыңнаткан.
Агентилелдиң ажылдакчылары болгаш даг-руда компаниязының төлээлери Ада-чурттуң Улуг дайынының хоочуннары Георгий Васильевич Абросимов, Наталья Ивановна Маслова, Ада-чурттуң Улуг дайынының киржикчилеринге деңнеп каан Кызыл хоорайда Кирилл Иванович Марков, Кызыл кожууннуң Каа-Хем суурда Анатолий Михайлович Крутиков, Таңды кожууннуң Балгазында Илларион Васильевич Шелепов, “Бүзээлеткен Ленинградтың чурттакчызы” деп хөрек демдээниң эдилекчизи – Кызылдан Борис Борисович Подгорный, фашистиг концлагерьлерге хоругдадып чораан Тожу кожууннуң Ырбан суурдан Алефтина Илларионовна Ширинкина оларның маадырлыг чоруунга четтиргенин болгаш хүндүткелин илереткен.
Республиканың хоорай, сумуларда чурттап турар хоочуннар аалчыларын чылыг-чымчак хүлээп алганнар.
