TMG news

Тайга-таскыл Тарлаг суурда 4G четкизи ажылдап эгелээн

21 октября 2022
45

Бии-Хем кожууннуң Тарлаг суурда “МТС” компаниязы соталыг харылзааның 4G дүрген харылзаалыг интернеттиг станцияны ажытканын кожууннуң чагырга чери дыңнаткан.

ТР-ниң чурагайлыг хөгжүлде сайыды Идегел Монгуш, “МТС” компанияның регионда салбырының директору Экер Хертек байырлыг хемчегге киришкен.

Тарлаг суур кожуун төвүнден 36 километрде тайга-таскыл черде. Дүрген харылзаалыг интернет тус черниң чурттакчыларынга кожуун төвүнче барбайн күрүне ачы-дузазын алыр болгаш өске-даа электроннуг шөлчүгештерни ажыглап эгелээринге эптиг арганы бээр.

Биче суурларга дүрген харылзаалыг интернет четкизин кожуп, хөгжүдер сорулгалыг төлевилелди регионнуң Чурагайлыг хөгжүлде база “МТС” компанияның күрүне-хуу эштежилге дугуржулгазы-биле Тарлаг сумузунга боттандырган. Ук төлевилелдиң ачызында Хөнделең, Аяңгаты, Чаа-Суур, Дус-Даг, Ак-Чыраа, Шанчы, Хөлчүк, Элдиг-Хем болгаш Тарлаг сумуларында 4G четкизи ажылдап эгелээнин Экер Хертек дыңнаткан.

Тываның Чурагайлыг хөгжүлде яамызы республикага чурагайлыг харылзааның девискээрин калбартыр, ооң шынарын улам экижидер талазы-биле ажылдарны регионнуң харылзаа операторлары-биле кады чедиишкинниг чорудуп турар.

Редакция TMG