Алдан-Маадыр сумузунуң Самбажык аттыг көдээ культура бажыңынга өг-бүлелер аразынга "Тараа дою" деп мөөрей болуп эрткенин культура чагырга чери дыңнаткан.
Мөөрейни сумунуң Төлээлекчилер хуралының даргазы Омак Куулар ажыдып, киржикчилерге чедиишкиннерни күзээн. Суму чагырга даргазының хүлээлгезин түр үеде күүседип турар Аржаана Чечек-ооловна чыылган чонга, киржикчилерге Шагаа байырлалын таварыштыр байыр чедирген.
Мөөрейге киржикчилер хооруп белеткээн ак тарааны соктап, челбип, дээрбеге тырткаш, далганын килдеп көргүскен.
Маңнай Каадыр-оолович биле Чодураа Бүрүн-Кысовнаның өг-бүлези 1-ги черге төлептиг болган. Тиилекчилерге 10000 рубльдиң сертификадын тывыскан. 2-ги черни Рустам Остапович биле Элина Сүге-Маадыровнаның, 3-кү черни Марат Каадыр-оолович биле Шончалай Шолбан-ооловнаның өг-бүлелери чаалап алган. Тиилекчилерге 5000 база 3000 рубльдиң сертификаттарын тывыскан.
Мөөрей-биле чергелештир ярмарка база болуп эрткен. Хемчегни тыва улустуң "Челер-ой" самы-биле төндүрген.
