Шагаан-Арыг хоорайның К-Э.К. Кудажы аттыг ном саңынга “Театр –ынакшылым, идегелим, бүзүрелим” деп солун ужуражылганы Россияда чарлаттынган Башкының болгаш дагдыныкчының чылынга тураскаадып эрттирген.
Эйлиг-хемчилерниң дилээ-биле Тываның Улустуң артизи Надежда Наксылды чалаан. Надежда Кууларовна сценага хөй чылдарда кады ажылдап, оюн-тоглаазын көргүзүп чоруур эжи Россияның алдарлыг, Тываның Улустуң артизи Анзат Куулар, Тываның Улустуң чогаалчызы, ТКУ-нуң литературлуг музейиниң эргелекчизи, башкы Мария Күжүгет, Тыва Республиканың алдарлыг ажылдакчызы, “Шын” солуннуң хоочун журнализи Светлана Балчыр олар-биле улуг-хемчилерге четкен.
Улуг-хемчилер аалчыларын ак, көк кадактар-биле, чараш роза чечектери-биле уткаан. Ужуражылганы Эйлиг-Хем сумузунуң ном саңының эргелекчизи Долаана Таргын ажыткан.
– Эрткен кыжын хар кажангызындан-даа улуг болган, хар, дош эрип, хем кежери айыылдыг апарганы-биле чогаадыкчы ажылывыс планында кирген бо ужуражылганы Шагаан-Арыгга эрттирер деп шиитпирледивис. Ынчангаш эйлиг-хемчилер бөгүн хоорайже көжүп келгени ол деп болур – деп, ном саңының эргелекчизи тайылбырлаан.
Надежда Наксыл чалааны дээш улуг-хемчилерге өөрүп четтиргенин илереткеш, ажыл-амыдыралын допчузу-биле таныштырган. Улаштыр ном саңының ажылдакчыларының тускайлап белеткээни солун айтырыгларынга харыылаан. Оон илерээни болза, школачы чылдарында бичии Надя балет артизи болур күзелдиг чораан. Салым-чолдуң оруу аныяк кысты Кызылдың уран чүүл училищезинге эккелген. Кирериниң шылгалдаларын дужаап, ырлап, шүлүктеп турганын ол чаптанчыг, каттырынчыг кылдыр сактып чугаалаанын Светлана Балчыр дыңнаткан.
“Ыраажы эвес-даа болза, шии ойнаарынга тааржыр кижи-дир дээш, Сиин-оол Лакпаевич Оюн мени хүлээп алганы аксым-кежии” деп Тываның Улустуң артизи сактып чугаалап, ада-иезиниң болгаш кырган-ава, кырган-ачазының дугайында чылыг сактыышкынны кылган.
К-Э.К. Кудажы аттыг ном саңының эргелекчизи Наталья Балчый ажыл-чорудулгазы-биле таныштыргаш, аалчыларга байыр чедирип, суй-белектерни сөңнээн.
Аалчылар кижи бүрүзү ажыл-амыдыралын допчузу-биле таныштыргаш, айтырыгларга харыылаан соонда, ном саңы театр болуп хуула берген. Чоннуң ынак артистери шиилерден үзүндүлдерни, сценажыткан каттырынчыг көргүзүглерни ойнааннар. Надежда Наксыл К.Кудажының, М.Күжүгеттиң чогаалдарын номчуаан, Анзат Куулар аян ырызын бараалгаткан.
Улуг-Хемниң культура ажылдакчылары, мергежилинге кайгамчык бердинген Кара-оол Донгакович Натпий-оолду, Илья Николаевич Моховту, Людмила Васильевна Байыр-оолду, Татьяна Дун-Терековна Монгушту болгаш өскелерни-даа хоочун журналист Светлана Балчыр сактып чугаалаан. Ол хөй чылдарның дургузунда “Чаатының ыраажызы”, “Эйлиг-Хемниң эдискизи”, “Юморина” мөөрейлерниң жюри кежигүнүнче чаладып ажылдаанын сактып чугаалаан. Бо чылын “Чаатының ыраажызы” 30 чыл оюн демдеглээринге белеткенип турары өөрүнчүг дээрзин журналист онзалап демдеглээн.
Эйлиг-Хемниң чурттакчыларын төлээлеп келген хөй ажылдакчылар сумузунда ном саңының эргелекчизи Долаана Тамдынның кызымаккай ажылынга бедик үнелелди берген.
Эйлиг-хемчилерниң белекке берген ангор өшкүлериниң бриллиант чайырлыг дүгүнден аргаан чараш аржыылдарын эштипкен аалчылар чыылганнарга күдүк базып мөгейип, база катап уджурашкыже деп байырлашкан.
