Тээлиде школаның септелгези август 20-де доостур

ТР-ниң Дээди Хуралының депутады Ульяна Монгуш үндезин септелге чоруттунуп турар Тээли школазынга четкен. Септелге ажылдары бүрүнү-биле август 20-де доостурун кожууннуң өөредилге эргелели дыңнаткан.

Объектиниң хүлээникчизи – ук школаның доозукчузу, хууда сайгарлыкчы Ужар-оол Иргит. Чаа өөредилге чылында чаартынган школа оолдар болгаш уругларга эжиктерин ажыдар.

– Үндезин септелгени үе-шаанда доозар дээш, Сүт-Хөл, Чөөн-Хемчик, Эрзин кожууннардан шыырак дээн тудуг¬жулар бригадазы чыглып келген. Бай-Тайганың эң-не тергиин каңнакчылары, септелге чоруттунуп турар школаның доозукчулары объектиде хаара туттунган. Тудугну тус черниң хууда сайгарлыкчызы Ужар-оол Иргит удуртуп турар. Бо күзүн делгем, чырык школа чүс шаа оолдар болгаш уругларны хүлээп алырынга белен болур – деп, депутат демдеглээн.

Тывада «Өөредилгениң школа системазын чаартыры» программа үш дугаар чыл ажылдап турар. Ук программа езугаар сентябрь 1-ге чедир 46 көдээ школаның септелгези чоруттунарын сагындыраал.