Тываның төвүнге Тере-Хөл кожууннуң шаңналы дээш стол теннизинге республка чергелиг маргылдаа болуп эрткенин чагырга чери дыңнаткан.
Стол теннизинге аңгы-аңгы назы-хар аайы-биле спортчулар киришкен. Маргылдааның хүндүлүг аалчызы – Тываның спорт сайыдының хүлээлгезин күүседип турар Владимир Түлүш. Ол теннис ойнакчыларынга байыр чедирип, тиилелгени күзээн.
Маргылдаага 18 харга чедир, 18-49, 50 база 65 хардан өрү назылыг эр биле херээжен теннис ойнакчылары, эжеш спортчулар солун оюнун көргүскен.
Команда аайы-биле маргылдаага бирги черни «Хемчик» (Валерьян Ондар, Алдар Ондар, Ангелина Херел-оол) командазы, ийиги черни «Правый» (Андрей Салчак, Чаян Шогжал, Соланж Монгуш) командазы, үшкү черни «Победа» (Оолак Бады, Артемий Чымалдай, Валерия Сарыглар) база «Үш Мөңгүлек» (Шолбан Очур, Намзырай Ооржак, Сенденмаа Дивии) командалары чаалап алган.
Тере-Хөл кожууннуң чагырга даргазы Вячеслав Мижит маргылдааның деткикчилери – «Ойна» алдын тывыш артелинге база «Новый Базас» кызыгаарлаан харыысалгалыг ниитилелге четтиргенин илереткен.
Республикада теннис ойнакчыларының саны көвүдеп, спорттуң бо хевиринге сонуургалы улгадып турарын чагырга чери демдеглээн.