Тываның көдээ ажыл-агый сайыды Сергей Ондар ыраккы Тере-Хөл кожуунче ажыл-агыйжы сургакчылаашкын-биле четкенин яамы дыңнаткан.
– Тере-Хөлдуң чурттакчы чонунуң ажыл-чорудулгазының кол улгашыынкыны – мал ажылы. Кожуунда 163 малчын коданнарда 4688 баш бода мал, 5982 шээр мал, 2155 баш чылгы мал, 737 сарлык бар.
Көдээ ажыл-агый яамызының шугуму-биле күрүне деткимчезиниң талазы-биле хамаатылар хүлээп алыышкынын чоруткан. Тере-хөлчүлерниң киирген чамдык төлевилелдерин күрүне программалары дамчыштыр боттандырып болурун демдеглеп алдым.
Кунгуртуг суурдан сайгарлыкчы Марина Кочаа «Агростартап» программа таварыштыр 2020 чылда күрүнеден бир сая 350 муң рубль түңнүг деткимчени алгаш, какпактаан инек эъдин бүдүрер биче цехти ажыдып алган. Бүдүрүлгениң күчүзү эвээш-даа болза, садыгларже какпактаан эътти дужаап, тус черниң чурттакчыларының хереглелин хандырып турар.
Кунгуртугда малчыннарның уругларынга школа чанының интернады эки үлегер-чижек. Шак мындыг интернаттар кожуун бүрүзүнге турар ужурлуг – деп, сайыт ажыл-агыйжы сургакчылаашкынын түңнээн.
Тываның көдээ ажыл-агый кооперациязын болгаш арат бизнезин хөгжүдер фондунуң төлээзи Артыш Донгак кунгуртугжулар эгелеп чоруур араттарны деткиир «Агростартап» программазынга киржир күзелдиг болганын дыңнаткан. Ол ышкаш хүлээп алыышкынга келген улустуң хөй кезии күрүне деткимчези-биле көдээ ажыл-агый техниказын салып алыр хевирни сонуургап турган.
Тываның Көдээ ажыл-агый болгаш аъш-чем яамызының Хүндүлел бижиктерин мал эмчизи Оксана Долчунга, көдээ ажыл-агыйның хоочуну Анна Идамга, Каргы сумузунда арат ажыл-агыйының баштыңы Айбулат Кыргыска, Эми сумузунда арат ажыл-агыйының баштыңы Болат Мунзукка сайыт тывыскан.
