Тере-хөлчүлер шиилер көрүп, тыва аудиономнарны дыңнааннар

Чедери берге Тере-Хөл кожууннуң төвү Кунгуртуг сумузунга К. И. Чуковский аттыг уругларның ном саңының ажылдакчылары болгаш Тываның күрүнениң ойнаар-кыстар театрының артистери чедип, чурттакчыларга культура-чырыдыышкын ажылын чоруткан.

Тываның күрүнениң ойнаар-кыстар театрының артистери «Суг акпас алышкылар», «Шагаам чараш чанчылдары» шиилерни, «Бодарал» театржыткан көргүзүгнү бараалгаткан. Көрүкчүлер ойнаар-кыстарны “диргизип”, сценага баштаарын мастер-класска өөренип алган.

Ном саңының ажылдакчылары «Тыва номчуп тур» литературлуг төлевилелди база номнар делгелгезин таныштырган. Кунгуртугжулар тыва аудиономнарны дыңнаар аргалыг болган. Ол ышкаш уругларга угаан сайзырадыр оюннарны эрттирген.

«Культурлуг десант» төлевилел көдээниң чурттакчыларын культура болгаш уран чүүлче хаара тударынче угланганын сагындыраал.