Тере-хөлчүлерден Шагаа сөнү

Шагаага уткуштур база Ада-чурт камгалакчыларының хүнү таварыштыр тускай шериг операциязында киржип турар дайынчыларга деткимче чыыр ажыл шалыпкын чоруп турар.

Ай санаашкыны-биле санаарга, бо чылын Шагаа байырлалы февраль 21-де болур, ынчангаш орук-суурну санавышаан, февраль 10-га чедир ачы-буян дузаламчызын чыыр.

Республиканыӊ чону бир демниин көргүзүп, чаңгыс чер-чурттугларын идепкейлии-биле деткип турар. Ыраккы Тере-Хол кожууннун чону база дайынчыларывыска боова-боорзакты, аът эдиниң үүжезин, какпактаан инек эъдин белеткээн.

Тывавыстың эрес-дидим оолдарының хей-аъды, сүлде-сүзүү кезээде бедик болурун күзеп, шериглеривис шупту онча-менди чанып келирин тере-хөлчүлер йөрээп, Шагааның сөңүн дамчыткан.

Тывадан шериг албан-хүлээлгелиглерге база оларның өг-бүлелеринге дуза көргүзер талазы-биле республиканың каттышкан штавы Шагаа бүдүүзүнүң дузаламчы белектерин чыып турар. Адрези: Кызыл хоорай, Кочетов кудумчузу, бажың 155, «изиг шугум» телефону 8-394-222-17-44.

Ол ышкаш Ниити-российжи улусчу фронтунуң Тывада салбырында ачы-дуза чыыр пункт ажылдап турар. Адрези: Кызыл хоорай, Кочетов кудумчузу, бажың 30, кабинет 26, харылзажыр телефон дугаары: 8 (39422) 2-10-50.