Бүгү Тываны камгалап турар Ыдыктыг Бай-Тайганың дагылгазы май 16-да болуп эрткен.
Тыва чоннуң ыдыктыг сүзүглели болур Бай-Тайганың дагылгазының ёзулалы эрткен соонда, тыва эр улустуң үш адаан-мөөрейи болуп эрткен. Тыва эрлерниң үш мөөрейи эр хиндиктиг кижиниң бичиизинден тура-ла иштики сагыш-сеткилин сайзырадыр, мага-бодун дадыктырар болгаш чөптүг чорукка ынак болурун кижизидип чораан. Шынчы адаан-мөөрей тиилээннерниң хей-аъдын оон-даа көдүрер, аштырганнарга частырыын, четпестерин эдип алгаш, дараазында тиилелге дээш туржур арга-шинекти берип турар. Тыва эрлерниң үш оюннарының бирээзи, тыва ча адар мөөрейни Тыва үндезин культура төвү сөөлгү чылдарда бедик деңнелче үндүрүп,чон аразында калбаа-биле сайзырадып чоруур.
Ыдыктыг Бай-тайганың дагылдазының соонда тыва ча адарының баг адар хевиринге дараазында адыгжылар тергиидээнер:
Бирги черни Монгуш Мөңгүн-оол (Чөөн-Хемчик кожуун), ийиги черни Монгуш Андрей (Эрзин кожуун), үшкү черни Ондар Ринчен (Сүт-Хөл кожуун), дөрткү черни Өпей Сайын-Херел (Бай-Тайга кожуун) база бешки черни Делгер-оол Руслан (Сүт-Хөл кожуун) чаалап алганнар.
«Тыва улустуң ёзу-чаңчылдарын ыдык сагып, ону дараазында салгалдарга арттырары-биле улуг үлүг-хууну киирип чоруур, үш адаан мөөрейниң киржикчилеринге, тергиин болган адыгжыларга изиг байырывыс чедирип, ам-даа улуг чедиишкиннерни күзеп, хей-аъдыңар бедик, угаан-медерелиңер оккур, салып алган сорулгаңар кезээ шагда бүдер болзун деп йѳрээр-дир бис!» деп Тыва үндезин культура төвү социал четкилер таварыштыр дамчыткан.
ТМГ-медээлер.
Тыва үндезин культура төвүнүң чуруктары.
