Өвүр кожууннуң Дус-Даг сумузунга «Өгбелерниң эртинезин өргүн чонга арттыраалы» деп Тыва Республиканың Улустуң хөөмейжизи Герман Кууларның 60 харлаанынының найырынга тураскааткан эр кижиниң үш адаан мөөрейлериниң бирээзи, тыва ча адар мөөрей болуп эрткенин Тыва Үндезин культура төвү дыңнадып турар.
Тыва чоннуң үш адаан мөөрейи эр кижиниң иштики сагыш-сеткилин сайзырадыр, дадыктырар болгаш чөптүг чорукка ынак болурунга кижизидип чораан хей-аът киирер мөөрейи болуп турар. Дус-Даг сумузунга болуп эрткен тыва ча адар оюннуң баг адар хевиринге тергиидеп үнген адыгжыларны таныштыраалыңар:
Бирги черни Кежик Успун (Бай-Тайга), ийиги черни Мөңгүн-оол Монгуш (Чөөн-Хемчик), үшкү черни Ай-Херел Дамчат (Өвүр), дөрткү черни Отчутай Отсур (Эрзин), бешки черни Айдың Тюлюш (Өвүр) чаалап алганнар.
Тыва Үндезин культура төвү өгбелериниң езу-чаңчылдарын ыдык сагып, ону дараазында салгалдарга арттырары-биле улуг үлүг-хууну киирип чоруур улуг хөөмейжи Герман Белековичиге, мөөрейниң киржикчилеринге, тергиин болган адыгжыларга байырын чедирген.
Тергиин адыгжыларны илереткен
12 июля 2022
63