Көдээ суурларда хөй-ниити девискээрлериниң чаагайжыдылгазы уламчылавышаан.
Суурларда амыдырал-чуртталганың шынарын бедидеринче угланган «Көдээ черлерниң комплекстиг хөгжүлдези» күрүне программазы-биле ажылды чорудуп турар.
Кызыл кожууннуң Терлиг-Хая суурда уругларның чаа ойнаар шөлүн ажыглалче кииргенин чагырга чери дыңнаткан. Хууда сайгарлыкчы Чечен Кара-Сал объектини туткан.
Кожууннуң, сумунуң удуртулгазы уругларның өөрүшкүзүн үлежип, байырлалга киришкен.
ТР-ниң Экономиктиг хөгжүлде болгаш үлетпүр яамызының дыңнатканы-биле алырга, төлевилелдерни федералдыг, республика, тус черниң бюджеттеринден, ол ышкаш бюджеттен дашкаар инвестицияларындан акшаландырып турар.
«Көдээ девискээрлерниң комплекстиг хөгжүлдези» күрүне программазы чурттакчыларга таарымчалыг байдалды тургузарындан аңгыда, аныяк тускай мергежилдиглерни көдээ суурларже хаара тудар сорулгалыг. Тываның кожууннарында социал инфратургузугну хөгжүдеринге бо төлевилелдерниң күүселдези чугула базымны бээр.