Тываның өөредилге сайыдының хүлээлгезин күүседип турар Ренат Ооржак Тес-Хемде «Сайлык» база Эрзин кожуунда «Отчугаш» лагерьлерниң ажылын хынаанын ТР-ниң Өөредилге яамызы дыңнаткан.
Кайы-даа лагерь график езугаар хуусаазында ажыттынган, неделя ажыг үе дургузунда Тываның аңгы-аңгы булуңнарындан уруглар арыг агаарлыг черлерде дыштанып турар.
– Чагытай хөлдүң эриинде «Байлак» лагеринге 6 класс тургаш, дыштанган мен. Уттундурбас үелер сагыш-сеткилде арткан… Амгы үеде уругларның дыштанылгазы – мээң ажыл-ижимниң кол кезээ…
Тес-Хем кожуунда «Сайлык» база Эрзин кожуунда «Отчугаш» стационарлыг лагерьлерниң ажылын хынадым. Кайы-даа лагерьлер график езугаар хуусаазында ажыттынган, неделя ажыг үе дургузунда Тываның аңгы-аңгы булуңнарындан уруглар арыг агаарлыг черлерде дыштанып турар. Лагерьлер ине бүрүлүг арга ортузунда турар. Уруг-дарыгның мага-бодунга ниитизи-биле ажыктыг.
Россияның Чырыдыышкын яамызы уругларның дыштанылга лагерьлеринге кижизидилге ажыл-чорудулгазының чаңгыс аай программазын бадылаанын демдеглекседим. Ук программаже регионалдыг кезектерни киирген болгаш, чедимчелиг боттанып турар. Уругларның хүн бүрүзү чаа-чаа билиглер, солун чүүлдер-биле долган. Лагерьниң шупту чайгы ээлчеглери «Баштайгылар шимчээшкининиң» деткимчези-биле эртер.
Оолдар, уруглар-биле чугаалаштым. Лагерьге дыштаныры эки дээрзин уруглар чугаалап турдулар. Чеми чаагай. Уруглар кижизидикчи башкылары база вожатыйлары-биле эп-найыралдыг. «Сайлык» биле «Отчугаш» лагерьлеринде бистиң университедивистиң база өске-даа дээди өөредилге черлериниң студентилери – чогаадыкчы аныяктар вожатый кылдыр ажылдап турарлар.
Лагерьлерде 7-ден 17 хар чедир 100 бичии-ле ажыг уруг хаара туттунган. Үш сезоннуң шупту путевкалары саттынган.
Келир чылын федералдыг программа езугаар «Сайлык» лагериниң чемненилге блогун болгаш эмнелге кабинедин чаартырын сагындырайн. Бо чылын «Таежный» лагериниң үндезин септелгези кылып дооскан.
Уругларның дыштанылга лагерьлериниң ажыл-ижин хыналдада алдым.
