Тес-Хемниң культура ажылдакчыларының деткимчези

Украинада тускай шериг операциязында киржип турар шериг албан-хүлээлгелиг дайынчыларны болгаш эки турачыларны деткээн ачы-буян акциязы уламчылап турар.

Тес-Хем кожууннуң культура ажылдакчылары Улусчу чогаадылга төвүнге болуп эрткен «Узун Тезим уран чүүлү сайзыразын!» деп оюн-тоглаалыг концерттен кирген орулгазын ачы-буян чедирилгезинче угландырган. Олар 26000 рубльге шай, таакпы, ажылчын хол-хаптар, чунарда ажыглаар чүүлдер, какпактаан эът, консервалар, чигирзиг чемнер дээш оон-даа өске чугула херек чүүлдерни Кызыл хоорайда, Кочетова 155-те бактаап турар штабка хүлээдип чедиргеннер.

Ол ышкаш Самагалдайның Симчит Авый-оол аттыг уругларның уран чүүл школазының коллективи 5000 рубльге футболка, иштики хептерни шериг оолдарывыска дамчыткан.

Төрээн Тывавыстың эрес-дидим оолдарын онча-менди чанып келир болзунам!