Тес-Хемниң шылгараан малчыннары хүн станцияларын алган

Мал оолдаашкынының түңнелдери-биле малдың баш санын камгалап ап, а ол ышкаш сөөлгү ийи чылдың дургузунда үндүрүглерин болгаш камгаладылга чыылдаларын өй-шаанда төлеп ап турган «Кыштаг» төлевилелиниң киржикчилерин Тываның Көдээ ажыл-агый болгаш аъш-чем яамызы хүн херели-биле ажылдаар станцияларны дамчыдып турар.

Тес-Хем кожууннуң шылгараан кыштагжылары: О-Шынаадан Олча биле Ай-Херел Ооржактар, Ү-Шынаадан Валентин биле Ай-кыс Сартыылдар, Ак-Эриктен Сайын Сагаан биле Чойгана Калдан, Белдир-Арыгдан Аяс биле Анай-Хаак Адыялар, Самагалдай суурдан Виталий биле Анжела Хертектер.

Көдээ ажыл-агый эргелелиниң дыңнадып турары-биле алырга, кожуунда «Кыштаг» төлевилелиниң киржикчилериниң саны – 42.

Бо чылын республиканың бүгү булуңнарындан 50 көдээ ишчи 50 хүн станцияларын алган. Доктаамал чырык хандырылгазы чок малчыннарга ук электри хандырар комплект хүн бүрүде ажыктыын амыдырал бадыткаан.