Аксы-Барлык школазынга “Тевектиң күчүтени” деп атты эдилекчизи Отчугаш Хомушку өөреникчилерге болгаш адаларга солун ужуражылганы эрттиргенин өөредилге чери дыңнаткан.
Ук школаның доозукчузу бодунуң чедиишкининиң төөгүзүн уругларга чугаалап, бергелерге черле торулбайн, бурунгаар чүткүлдүг болурун чагаан. Тевектиң күчүтениниң эрттирген мастер-клазын чыылганнар улуг сонуургал-биле көрген.
Отчугаш Хомушку чүгле республика чергелиг Шагаа оюннарының тиилекчизи эвес, а 2020 чылда бурят чоннуң «Алтан-Мундарга» деп национал байырлалының тевек оюнунга чемпионнаан.
2023 чылда Тыва үндезин культура төвүнге Шагаа таварыштыр болуп эрткен тевек оюнунуң тиилекчизи. Оон-даа хөй санны тептер аргалыг турган-даа болза, тевекчи 2023 чылдың санынга чедир доктааган. Тевек оюнунга Хомушку Отчугаштың эң хөй саны 3346 чедир четкен.
К.Б. Ондар аттыг Тыва улустуң езу-чаңчылдарының, аас чогаал болгаш ус-шеверлер төвү, Барыын-Хемчик кожууну тургустунганындан бээр 100 чыл оюнда, өске чоннарның мөөрейлеринге Тываның адын бедик деңнелге тудуп чоруур тевек оюнунуң тергиин ойнакчызынга, нептередикчизинге, Барыын-Хемчиктиң төлептиг оглунга “Тевектиң күчүтени” деп бедик атты тывысканын сагындыраал.