«Тиилелге дээш!» деп эң-не эки сеткил-бодал-биле

Эрзин кожуун чагырга даргазының албан-хүлээлгезин күүседип турар Түрген Сагды чаңгыс чер-чурттугларын күскү ачы-дуза чыылдазынга идепкейлиг киржиринче кыйгырган.

– Бо хүннерде Тывадан тускай шериг операциязының девискээринде чаныш-сыныш чок албан-хүлээлгезин күүседип турар эрес-дидим дайынчыларывыска республиканың чонунуң мурнундан деткимче-дуза чоруурун билир бис.

Чер-чурттувустуң орлан-шоваа оолдарынга, камгалакчыларывыска дайын шɵлүнге эргежок чугула херек чүүлдерин четчележип бээри-биле бүгү таланың дуза-деткимчезин чедирер дээш саң-хɵɵнүң агар саны ажыттынган база эт-бараан хүлээп алыр ажылдар чоруттунуп турар болганда, кожууннуң бүгү чурттакчы чонун – албан черлерин, ажылдакчыларны, хууда сайгарлыкчыларны, хамаатыларны, ашка-тɵгерик талазы-биле демниг дузалажырынче кыйгырып тур мен.

Бир дугаарында мурнуку одуругда дайынчыларывыска эргежок чугула техниктиг дериг-херекселдер садар акшаны демниг чыгжыптаалыңар. Оон ыңай чылыг идик-хеп, эмнер база оон-даа ɵске дайын байдалынга хүн-бүрүде онза херек чүүлдерни четчелеп берээлиңер.

Чуртувустуң алдар-адын, чонувустуң хостуг эргезин камгалажып база тайбың келир үеже бистерниң бүзүреливис дээш бодунуң дыжын, кадыкшылын база амы-тынын артынга каап, кажар болгаш кээргел чок дайзын-биле тулчуп турар оолдарывыска «Тиилелге дээш!» деп эң-не эки сеткил-бодал-биле чыып белеткээн дуза-деткимчевисти чедирээлиңер, чонум!