Май 9 – Тиилелге хүнүн уткуштур Тыва Республика тускай шериг операциязының девискээринче 65 тонна ачы-дуза чүъгүн чоруткан. Бо дээрге сөөлгү чылдарда чоруткан эң улуг хемчээлдиг ачы-дуза акциязы-дыр.
Тываның Чазааның деткимчези-биле Улусчу фронтунуң регионалдыг салбыры «Улусчу фронт. Бүгү чүүлдү Тиилелгеже!» бүгү-российжи акцияның дузаламчы чыылдазын марттың 16-да эгелээш апрель 30-де дооскан.
Ачы-дуза чыылдазынга бүгү республика: муниципалдыг районнарның чурттакчылары, күрүне албан черлериниң ажылдакчылары, эки турачылар, сайгарлыкчылар, өөредилге албан черлери чаңчыл езугаар идепкейлиг киришкен.
Чээрби тоннаның ийи база беш тоннаның бир чүък машиналары, 20 тоннаның «КамАЗ» чүък машиназындан тургустунган автоколонна тускай шериг операциязының девискээринче углай үнүпкен. Чүъктү Курск, Херсон, Запорожье областар, Донецк болгаш Луганск улусчу республикалар дээш элээн каш угланыышкыннарга үлээр.
Чээрби чеди генератор, 44 бензин-биле ажылдаар хирээ, 20 рация, дөрт «кушкаш», эки турачыларның кылган 183 чажыртынып шыптынар четкини, эм-таң, аъш-чем, тудуг материалдары дээш, оон-даа өске чүүлдер чүъкте чүдүртүнген. Ол ышкаш албан черлериниң болгаш кижилерниң дамчытканы «Лада Нива», «УАЗ Хантер», «УАЗ» марканың каяа-даа торулбас чеди автомашинаны база тос мотоциклди фронтуже чоруткан.
Тываның Баштыңы Владислав Ховалыг Ховалыгның даалгазы-биле «Деткимче» фонд ачы-дузаны чедирип бар чоруур шупту машиналарны кывар-чаар чүүл-биле хандырган. Оон аңгыда, шериг албан-хүлээлгелиглерниң болгаш Кызылда демир-орук батальонунуң дилээ-биле, регионда улуг инвесторларының деткимчези-биле саткан тускай дериг-херекселди Москвадан болгаш Кызылдан чоруткан.
Тиилелге хүнүнүң бүдүүзүнде гуманитарлыг дузаламчы адрестеринге чеде бээр. Ооң-биле чергелештир хереглел ам-даа бар болганда, фронтуга ачы-дуза чыылдазы республикага уламчылаар. Күзелдиг кижи бүрүзү ачы-буян кампаниязынга киржип болур – Кызыл хоорай, Чульдум кудумчузу, 40А, өрээл 20, 21. (Улусчу фронтунуң регионалдыг салбыры), Ленин кудумчузу, 5 (Тываның күрүне университединде «Кады бис» штавы). Харылзажыр телефону: +7 (39422) 2-10-50.