В. Халилов аттыг Тываның күрүне филармониязында үрер хөгжүм болгаш Тыва Чазааның Тимур Дулуш аттыг үрер хөгжүм оркестриниң төөгүзүнге тураскааткан делгелге ажыттынган.
Оркестрниң директору Артур Дулуштуң дыңнатканы-биле алырга, делгелгеде экспонаттарны парлалга албаны 2005 чылдан тура чыып эгелээн. Ында үрер хөгжүм оркестриниң шаңналдарын, кубоктарын, Тываның массалыг информация чепсектериниң журналистериниң аңгы-аңгы чылдарда оркестр дугайында солун, сеткүүлдерге бижээн чүүлдерин, номнарны делгээн.
– Эң-не баштайгы чедиишкинивис – «Үстүү-Хүрээ» дириг хөгжүм болгаш чүдүлгениң фестивалының дээди шаңналы. Ол ышкаш «Спасс суургазы» фестивалындан, Тайвань, Польша дээш оон-даа өске чурттардан шаңналдарывыс мында делгеттинген. Филармонияның удуртулгазы-биле дугуржулга езугаар делгелге доктаамал үндезинге турар. Үе-үе болгаш экспонаттар немежир. Ол ышкаш 3D хелбир чуруунга оркестрниң четкен черлерин демдеглээри база көрдүнген – деп, Артур Дулуш чугаалаан.
Делгелгеде Будда бурганның овур-хевири көскү черни ээлеп турар. Ажылдың автору улусчу скульптор Николай Звонков. Бо чайын Барнаул хоорайның тургустунганындан бээр 295 чыл оюнда Тываның Чазааның үрер хөгжүм оркестри фестивальга киржип турган. Хоорайның Культура яамызы биле скульптор Будданың овур-хевирин белекке дамчытканын парлалга-секретары Павел Чесноков дыңнаткан.
Экспонаттарның бирээзинде Тываның Революстуг аныяктар эвилелиниң 1925-1931 чылдарда ажыл-чорудулгазының дугайында материалдарда үрер хөгжүм оркестриниң дугайында 1925 чылдың декабрь 22-де демдеглел бар.
Тываның Араттың Революстуг Шерииниң составынче үрер хөгжүм оркестри кирип турганын айыткан. Коллективтиң тургустунганының тодаргай хүнү амдыызында билдинмес, архив документилери-биле ажыл чоруттунуп турар. Ынчалза-даа оркестр 1929 чылда Тываның Араттың Революстуг Шерииниң составынга турган деп чиге медээлер бар. 1930 чылда аъттыг үрер хөгжүм оркестриниң чуруун В. Ермолаев тырттырган.
Баштайгы удуртукчулары – Семен Коровин, Семен Севен, Максим Мунзук, Леонид Израйлевич, Сергей Красный.
Тываның күрүне филармониязынга келген көрүкчүлер болгаш аалчылар ам үрер хөгжүм оркестриниң делгелгезин сонуургап болур.
#ТМГМедээлер #Тыва #Тывамедээ #Тывадыл #Тывамедиагрупп #Тува