Тыва Республиканың чазааның даргазының оралакчызының албан-хүлээлгезин база күүседир, одалга болгаш энергетика сайыдынга Мерген Балыкаевич Дагба май 13-те томуйлаткан.
Республиканың коммунал ажыл-агыйын, одалга болгаш энергетика адырын харыылаар чаа томуйлаткан удуртукчу май 14-те Шагаан-Арыг хоорайга чедип, 2021-2022 чылдың одалга сезонунуң кандыг дооступ турарын хынап, республиканың улуг кожууну Улуг-Хемниң төвүнүң келир кышка белеткелиниң дугайында айтырыгны харыысаалгалыг ажылдакчылар-биле сайгарып чугаалашкан.
Чурттаар оран-саваның капитал септелгезин чорудар Фондунуң удуртукчузу, ТР-ниң тудуг болгаш комммунал-ажыл-агый яамызының сайыдының оралакчызы тургаш-ла, республиканың коммунал болгаш энергетика адырында, ооң иштинде Шагаан-Арыг хоорайда, байдалды эки билир болганы, Мерген Балыкаевичиге чаа харыысаалгалыг ажылга дораан тодаргай хемчеглер ап кириптер арганы берген.
Одалга сезону төнген соонда, чылыг четкилериниң хоорзаларының болгаш изиг сугну ажыдып-хаар дериг-херекселдерниң кошкак, суг эрттирип турар черлерин илередир гидравликтиг шенелделерни үезинде чорударын ол дааскан. Ол шенелделерден келир кышка белеткенир септелге ажылдарының хемчээли билдинер.
Ажылчын хуралдың түңнелинде М. Дагба кышка белеткел айтырыгларын харыысаалгалыг удуртукчулар амы-хууда контрольга алырын болгаш ол дээш удуртукчуларның амы-хууда харыысаалгазының дугайында база катап сагындырган.
ТМГ-медээлер
