Улуг-Хем кожууннуң Торгалыг сумузунда чаа эмчи амбулаториязы болгаш клуб тудуунда ажылдар кидин түлүк эгелээнин чагырга чери дыңнаткан.
Сумунуң эрги культура одаа аварийлиг байдалга келгени-биле торгалыгжыларга шагда-ла чаа клуб тудуу негеттинип келген. Бо чылын «Сорунза» төлевилел-биле чаа культура объектизиниң тудуу эгелээн. Тудугже тус черниң чурттакчыларын хаара туткан. Бо хүннерде тудугнуң турар черин каскаш, таваан кудар ажылдар эгелээн. Чаа клуб Торгалыг суурже чүгле кирип кээр черде туттунуп турар, аалчыларны уткуур «суурнуң арны», чараш өргээзи болур.
Эмчи амбулаториязының ниити шөлү 195 дөрбелчин метр болур. Тудугну «Кристалл Плюс» кызыгаарлаан харыысалгалыг ниитилел (Р.Д. Сенди) тудары-биле хүлээнип алган. Бо чылдың майдан эгелээш, октябрь айга чедир тудуп, ажыглалче киирер ужурлуг. Тудугда Торгалыг сумузунуң чурттакчылары хаара туттунган. Бо хүннерде таваан салыр ажылдар чоруп турар.
– Суурувуска дыка үр чылдарда чаа тудуглар-даа туттунмайн турган. Бо чылдан эгелеп төлевилелдер ачызында чаа эмнелге, клуб тудуглары эгелээнинге чонувус аажок өөрүп турар. 2026-2027 чылдарда чаа школа тудуун эгелээр деп турарынга база өөрүп, торгалыгжылар хей-аъдывыс бедип, тудугжуларга аъш-чем хандырылгазынга чонувус идепкейлии-биле киржип турарлар – деп, суму чагыргазының даргазы Антонина Ондар дыңнаткан.
Торгалыг суму чагыргазы тудуглар шалыпкын, үе-шаанда туттунзун дээш чогуур ажылдарны чорудуп турар. Тургустунган график езугаар суурнуң чурттакчы чону, албан черлериниң коллективтери тудугжуларның дүъштеки чемин кылып берип турарлар.