Улуг-Хем кожууннуң Торгалыгда көдээ ишчилер сиген кезилдезин доозуп турарын чагырга чери дыңнаткан.
Айдыс Домбаа сигенин кезип дооскаш, муң ажыг дүрүг сигенни сөөртүп алган. Бо хүннерде сулазын кестирип, багай эвес дүжүттү ажаап ап турар. Улаштыр кызыл-тас ажаалдазынче кирер.
Айдыс Домбаа салгал дамчаан тараажы. Ооң ачазы Олег Кара-оолович совхоз дүшкен соонда суггаттыг шөлге мал чеминиң культураларын чаштырып, каш чылдар дургузунда тарып келген.
Дуржулгалыг тараажы ажы-төлүнге бичиизинден тура-ла тараа тарыырының чажыттарын өөредип каан. Ам оглу боду тараазын чаштырып, комбайнны мунуп алгаш кезип турар. Айдыс база оолдарын, дуңмаларын эдертип алган сигенин, тараазын кестирип, бичиизинден-не өөредип, үлегерин көргүзүп турар.
