Чадаана хоорайдан тускай шериг операциязының киржикчизи Саян Ондар социал керээге үндезилээн күрүне деткимчезин алгаш, "Минутка" деп автомашина болгаш хевистер аштап чуур черни ажыдып алганын чагырга чери дыңнаткан.
Чөөн-Хемчик кожууннуң чагырга даргазының амыдырал-хандырылга болгаш чаагайжыдылга талазы-биле оралакчызы Кежик Сат, Чонну ажылга хаара тудар төптүн даргазы Мариана Монгуш болгаш “Ада-чурттуң камгалакчылары” күрүне фондузунуң салбырының кожуунда социал координатору Чойганмаа Куулар, Чадаананың хоорай чагыргазындан Айдыс Ооржак эгелеп чоруур сайгарлыкчыны деткип, чаа будурулгениң байырлыг ажыдыышкынынга киржип, чедиишкинниг ажылдаарын күзээн.
Сүт-Хөлдүң, Чөөн-Хемчиктиң келген кижилер, ылангыя чолаачылар автомашиналарын чугдурарындан аңгыда, хевистер, шала чадыгларын чугдуртуп ап турарлар.
Күрүнеден алган деткимчези-биле Саян Ондар автомашина болгаш хевистер чуурунга ажыглаар тускай дериг-херекселдерни садып ап, четчелеп алган. Бажыңнының чанында улуг машина тургузар чер – чаа оран-саваны туткан.
Дайынчы хөделиишкиннер хоочунунуң ажыл-херээн ажыдар кузели боттанган. Аңаа оолдары, кады төрээннери дузалажып турар.