ТР-ниң Иштики херектер яамызы эрткен чылда ажыл-чорудулгазын түңнээн

Полиция ажылдакчылары иштики херектер яамызының сайыды Сергей Кондрашовтуң удуртулгазы-биле эрткен чылда ажыл-чорудулгазын түңнээн. Хуралга ТР-ниң Дээди Хуралының Даргазы Кан-оол Даваа киришкен.

Тываның парламентизи яамы-биле доктаамал ажылдап турарын ол демдеглээн. Чүге дизе хамаатыларның айыыл чок чоруунуң, корум-чурум сагылгазының айтырыглары чонга хүн бүрүнүң чугула темалары болуп турар.

Уругларның айыыл чок чоруу дээш ада-иелерниң харыысалгазын улгаттырарынче, эзирик чолаачылааны, арага аймаан садып-сайгарарынга хажыдыышкыннары дээш торгаал хемчеглерни шыңгыырадырынче угланган хоойлужудулгага кезек саналдарны Тываның парламентизи база деткээн.

– Дээди Хуралдың депутаттары боттарының округтарынга чоннуң хуралдарын эрттирген. Ол бистиң кады ажылдажылгавыс бир херечизи болган. Хуралдарга полицияның, прокуратураның, кожууннарның болгаш сумуларның чагырга черлериниң ажылдакчылары киришкен.

Чыыштарга эзирик автомашина мунар чоруктуң уржуктарының, хуу мал-маганны орукка кадарбазының, араганы чажырып садар чорукка удур демисел, улуг улус болгаш назы четпээннер ортузунда кем-херек үүлгедиишкиннериниң чылдагааннарының дугайында чугаалаштывыс.

Чурттакчылар оперативтиг байдалды экижидериниң талазы-биле тодаргай саналдарын киирген. Бо ажыл иштики херектер органнарының ажылдакчыларынга база дузалыг болган деп санаар бис – деп, Дээди Хуралдың Даргазы саналын илереткен.

Эрткен чылдың түңнелдери-биле чуртта кем-херек үүлгедиишкиннериниң деңнелиниң эң дүрген кызырлыышкынының бирээзи Тывада демдеглеттингенин Кан-оол Даваа дыңнаткан. Ынчалза-даа яамы бодунуң ажылын улам күштелдирер сорулгалыг. Ындыг хөөн шын деп бодап турарын Кан-оол Даваа демдеглээш, полиция ажылдакчыларынга оларның амыр эвес ажылынга чедиишкиннерни күзээн.