Бөгүн Россияның эң улуг Тубтен Шедруб Линг сарыг шажын хүрээзинде А.Б. Чыргал-оол аттыг Кызылдың уран чүүл колледжиниң чурулга салбырының сургуулдарының ажылдарының «Сарыг шажынның Чырыы» деп делгелгези ажыттынган.
Россияның буддизм университединиң сарыг шажын уран чурулгазының, колледжтиң башкылары, Камбы-Лама эргелелиниң лама башкылары сургуулдарның чураан ажылдарын шилиир. Салым-чаяанныг аныяк чурукчуларның тергиин ажылдарын IV делегей чергелиг сарыг шажын шуулганының үезинде делгелгеге салыр.
Тываның Камбы-Ламазының оралакчызы Чамбал Монгуш башкы Шагааның Ак айында Күжүгет Шойгу аттыг культура фондузунуң ачызында туттунган улуг хүрээде сарыг шажыг темалыг кайгамчык делгелге ажыттынганы улуг ужур-уткалыг дээрзин демдеглээн. «Шак мыдыг хемчеглер аныяк чурукчуларның шилип алган мергежилинге сонуургалын улам күштелдирер. Тубтен Шедруб Линг хүрээзиниң чанында Россияның сарыг шажын университединде сарыг шажыг философиязын, медициназын база уран чурулгазын өөредип турар. Уран чүүл колледжи биле Тываның Камбы-Лама эргелели делгелгени кады демнежип эрттирип турарывыс, келир үеде өөредилге черинин сургуулдарының салым-чаяанын улам сайзырадырынга идигни бээр. Олар сарыг шажын уран чурулгазын ханы өөренип алыры-биле улаштыр бистиң университетче кирип ап болурлар. Чурукчуларга ында шупту таарымчалыг байдалдар тургустунган – деп, лама башкы чугаалаан.
Кызылдың уран чүүл колледжизиниң чурулга башкызы Чечек Монгуштуң чугаазы-биле алырга, делгелге-мөөрейге ортумак өөредилге чериниң сургуулдары киришкен. «Тывага август айда болуп эртер IV делегей чергелиг буддийжи шуулганынга культура албан черлери белеткенип турар. Бөгүн улуг хүрээвисте сургуулдарывыстың чураан ажылдар делгелгедивис. Тыва Республиканың уран чүүлүнүң алдарлыг ажылдакчызы, билдингир чурукчу, башкывыс Алексей Седипковтуң төлевилели-биле мөөрейни 2019 чылдан тура эрттирип турар бис. Киржикчилер сарыг шажын темазынга ажылдарын аңгы-аңгы техникага (чурулга, графика, батик) күүскеткен» – деп, чурулга башкызы таныштырган.
Чурулга салбырының үшкү курсчузу Падма Кара-Салдың «Мөргүл чырыы», «Алаңтостар» деп ийи ажылы хүрээде делгеттинген. Чурукчу «Мөргүл чырыын» дөрт хүн чураан. Ол сарыг шажын темазын сонуургап турар.
Тожу кожууннуң чедери берге сумуларының бирээзи Ырбан сумузундан Орлана Константинова делгелгени улуг сонуургал-биле көрген. Ол салым-чаяанныг аныяк чурукчуларның ажылдарынга бедик үнелелди берип, оларның сарыг шажын чүдүлгезинге сонуургалдыын онзалап демдеглээн.
Тывага август 17-ден 20-ге чедир болуп эртер IV делегей чергелиг буддийжи шуулган Сибирь федералдыг округка чылдың кол болуушкуннарының бирээзи болур. Шуулган чүгле календарьлыг хемчег эвес, а регионда инфратургузугну эде чаартырынга, шажын чүдүлге, өөредилгени болгаш культуралар аразында харылзааны сайзырадырынга чугула базым апаар ужурлуг.
#ТМГМедээлер #Тыва #Тывамедээ #Тывадыл #Тывамедиагрупп #Тува
