Тудуг адыры республиканың экономиказынга улуг ужур-дузалыг

Тываның Баштыңы Владислав Ховалыг найысылалдың тудуг объектилерин хынап көрген.
– Кызылдың тудуг объектилеринде ажыл-иштиң канчаар чоруп турарынга, ооң темпилеринге таарзындым. Спутник микрорайонунда болгаш Бай-Хаакская кудумчузунда 280 олуттуг чаа уруглар садтарынче уруглар ийи неделя улаштыр барып турарлар. Чылыы, чырыы, таарымчалыы тулган-на, а эң-не кол чүүл – чаа уруглар садтары уругларның сеткилинге дыка таарышкан.
Тудуг адыры чурттакчыларга болгаш республиканың экономиказынга улуг ужур-дузалыг. Рыноктуң конъюнктуразын кичээңгейлиг хайгаарап, чурттуң чазааның эгелээшкиннерин эдерти көрүп, боттуң хемчеглерин ажылдап кылырын уламчылап тур бис. Санкцияларга үскүлежип, оон-моон үнген кыйгыларга харыылап турзажок, тудугжулар холун кошкаш кылбайн, соксаал чок ажылдап турарлар – деп, Владислав Ховалыг чугаалаан.

Март 1-ден тура Кызылдың Бай-Хаакская кудумчузунда 825 олуттуг чаа школаның тудуун уламчылап эгелээн. Маңаа чаңгыс эвес удаа кээп турар болгаш мында ажылдың кайы хире шапкынчаанын көрүп тур мен. Бир ээлчегде-ле 60 кижи ажылдап, хамык чүүлдерге четтигип турар.

Полигонная кудумчузунда улуг хемчээлдиг инвестиция төлевилели:
17,9 муң дөрбелчин метр ниити шөлдүг 400 квартира;
101 квартираны өскүс уругларга садып алыр;
18 квартираны үрелир четкен оран-савадан көшкеннерге садып алыр;
281 квартираны садыглаашкынга салыр.

Иркутская кудумчузунда хөй аал чурттаар ийи бажың:
3,8 муң дөрбелчин метр ниити шөлдүг 104 квартира;
5 квартираны өскүс уругларга;
75 квартираны үрелир четкен оран-савадан көшкеннерге;
24 квартираны садыглаашкынга салыр.

Сагаан-оол кудумчузунда инвестиция төлевилели:
9,5 муң дөрбелчин метр ниити шөлдүг 180 квартира;
42 оран-саваны өскүс уругларга садып алыр;
36 квартираны көшкеннерге садып алыр;
“Чуртталга оран-савазы” федералдыг программаның 71 сая рубль ажыг акша-хөреңгизиниң күсели-биле Мурнуу микрорайонда инженер четкилери.