Россия Федерациязында чарлаттынган Башкы болгаш дагдыныкчының чылынга хамаарышкан баштайгы хемчеглерниң бирээзи Бии-Хем кожууннуң Туран хоорайга болуп эрткенин Национал школа хөгжүдер институт дыңнаткан.
Республиканың тыва дыл болгаш чогаал башкыларының ассоциациязының удуртукчузу, дээди категорияның башкызы, Россияның болгаш Тываның чогаалчылар эвилелиниң кежигүнү Менги Ооржактың педагогиктиг ажыл-чорудулгазының 25 чыл оюнга уткуштур делгелгениң ажыдыышкыны болган.
Башкының өөредилге-методиктиг ажылдарын, редакторлаан, рецензиялаан номнарын, очулгаларын, шүлүктериниң чыындыларын, педагогиктиг ажыл-ижинге хамаарышкан материалдарын болгаш өске-даа үндүрүлгелерин Туран хоорайда Сафьяновтар аттыг музейниң эргелекчизи Татьяна Верещагина чыып тургускаш, байырлыг байдалга делгелгени ажыдып, башкарып эрттирген.
Тыва Республиканың Дээди Хуралының өөредилге, культура, аныяктар политиказы болгаш спорт талазы-биле комитединиң даргазы Аяна Монгуш Менги Ооржактың башкылал ажылынга болгаш тыва дылдың сайзыралы дээш идепкейлиг ажылынга бедик үнелелди берип, Дээди Хуралдың Хүндүлел бижиин тывыскан.
Хөй-ниитиниң ажылынга башкының киирип чоруур үлүүн Туран хоорайның Төлээлекчилер хуралының даргазы Владимир Шейбин демдеглээн. М.Н. Ооржактың хөй талалыг ажыл-чорудулгазының дугайында кады ажылдап чоруур эш-өөрү – Бии-Хем кожууннуң өөредилге эргелели, Туранның 2 дугаар школазының баштаар чери, сумуларның школаларындан келген тыва дыл болгаш чогаал башкылары, ном-саңының ажылдакчылары байыр чедирген сөстеринге тодаргай чугаалааннар.
Национал школа хөгжүдер институттуң коллективи өөредилге-методиктиг делгелгениң ажыдыышкынынга киришкеш, ооң аалчылары-биле ужуражылганы эрттирген. Менги Ооржактың чогаадыкчы ажыл-чорудулгазынга хамаарыштыр илеткелди институттуң эртем секретары, филология эртемнериниң кандидады Алимаа Херел номчаан.
Республиканың өөредилге адырынга киирип чоруур үлүүн, тыва дыл башкылаашкының талазы-биле сырый, демниг кады ажылдажылгазының дугайында этнопедагогика лабораториязының эргелекчизи, педагогика эртемнериниң кандидады Алевтина Шаалы чугулалап демдеглээн.
Оон аңгыда институттуң ажылдакчылары Бии-Хем кожууннуң сумуларындан келген тыва дыл башкыларынга Тываның Баштыңының Айыткалында тыва дылдың сайзыралынга хамаарыштыр салдынган сорулгалар-биле база республиканың башкыларының удавас болур съездизиниң план-төлевилели-биле таныштырган.
