Айхан Чамзрын Туран хоорайда телефон, планшет, ноутбук септээр черни ажыдып алган.
Эгелеп чоруур сайгарлыкчы хууда ажыл-херээн ажыдып алыр дээш, Бии-Хем кожууннуң Чонну ажылга хаара тудар төвүнче документилерин дужаап, комиссияга төлевилелин ажыктыын тайылбырлап, шынзыдып шыдаан. Шак ынчалдыр күрүнеден үндүрүп бергени акша-хөреңгизи-биле нарын техника септээринге херек дериг-херекселди садып ап, четчелээн.
«Социал керээ» программаның эрткен чылгы киржикчизи “Өлчей” садыг төвүнде өрээлди хөлезилеп турар. Айхан шериг албан-хүлээлгезин эрттирип тургаш, телефон станциязының башкарыкчы радиотелефонизиниң билиглерин шиңгээдип алганы, амгы мергежилинге ажы-дузалыг болганы билдингир. Аныяк сайгарлыкчы Кызылга эжиниң нарын техника септээр черинге үш чыл ажыг ажылдавышаан, арга-дуржулгазын улум бедидип алган. Кажан Туран хоорайга өскүс дээш чурттаар бажың алыр ээлчээ чедип кээрге, ол дедир эглип келген.
– “Социал керээ” программазы эки билир мергежилимни бодумга орулга киирип алыр ажыл-херекче “хуулдурар” арганы берди. Мооң мурнунда бии-хемчилер харылзаа херекселдерин септедири-биле албан Кызыл чоруур ужурга таваржып турганнар.
Нарын техника септээринге херек артык кезектерни өртектери элээн өскен. Ону Абакан, Красноярск, Новосибирск хоорайлардан чагыдып ап турар мен. Ынчалза-даа телефон, планшет, ноутбук септедип алыры, чаа техника сатканындан черле дээре – деп, Айхан Чамзрын чугаалап турар.
Бии-Хем кожууннуң Чонну ажылга хаара тудар төптүң директору Елена Белекпенниң дыңнадып турары-биле алырга, «Социал керээ» программаның ачызында 2020-2021 чылдарда 34 бии-хемчи ажыл-херээн ажыдып алган. Бо чылын ук программага 35 кижи киржип болур. Хууда херээн ажыдып алыр дээн күзелдиг улустарның саны эвээш эвес дээрзин төптүң директору демдеглеп турар.
Чуруктарны Шончалай Ховалыг тырттырган
